شىمكەنت مۇناي زاۋىتى ك-4، ك-5 كلاسىنىڭ ديزەلىن شىعارا باستادى

«بۇگىنگى تاڭدا شىمكەنت مۇناي وڭدەۋ زاۋىتىندا ك-4 جانە ك-5 ديزەل وتىنىنىڭ تاجىريبەلىك-ونەركاسىپتىك پارتيالارى شىعارىلىپ، ونىمدەرگە ءتول قۇجاتتار رەسىمدەلدى جانە مەملەكەتتىك ورگانداردا ءونىمنىڭ كەدەن وداعىنىڭ تەحنيكالىق رەگلامەنتىنە سايكەستىگى تۋرالى دەكلاراتسيا الىندى»، - دەلىنگەن حابارلامادا.

شىلدە ايىنان باستاپ زاۋىت ك4 جانە ك5 ەكولوگيالىق كلاسىنا سايكەس كەلەتىن جوعارى وكتاندى بەنزيندەردى شىعارىپ كەلەدى.

وسىلايشا، شىمكەنت مۇناي وڭدەۋ زاۋىتى قازاقستان نارىعىن جوعارى ساپالى مۇناي ونىمدەرىمەن قامتاماسىز ەتۋ بويىنشا وزىنە العان مىندەتتەرىن تولىق ورىنداپ وتىر.

«قازىرگى ۋاقىتتا زاۋىتتىڭ قۋاتىن جىلىنا 6 ميلليون تونناعا دەيىن ارتتىرۋعا جانە وڭدەۋ تەرەڭدىگىن جوعارىلاتۋعا باعىتتالعان جوبانىڭ 2-كەزەڭى نىساندارىنىڭ قۇرىلىسى اياقتالىپ كەلەدى. جوبانى 2018-جىلعى قىركۇيەك ايىندا بىتىرەمىز دەپ جوسپارلاۋدامىز»، دەپ ءمالىم ەتتى ق م گ.

ەسكە سالا كەتسەك، 2018-جىلدىڭ 1- قاڭتارىنان باستاپ قازاقستان رەسپۋبليكاسىنىڭ اۋماعىندا كەدەن وداعىنىڭ «اۆتوموبيلدىك جانە اۆياتسيالىق بەنزينگە، ديزەلدىك جانە تەڭىز وتىنىنا، اۆياتسيالىق وتىنعا جانە مازۋتقا قويىلاتىن تالاپتار تۋرالى» تەحنيكالىق رەگلامەنتىنە سايكەس (ТР ТС 013/2011) K4 جانە K5 ەكولوگيالىق كلاستارىنداعى اۆتوكولىك بەنزينى مەن ديزەل وتىنىن شىعارۋعا جانە اينالىمعا كوشۋ جۇزەگە اسىرىلادى.