بيبىگۇل تولەگەنوۆا: قازاق جىگىتتەرى بايىسا، 4-5 بالا تۋعان ايەلىن كەرەك قىلمايدى

تانىمالدار اراسىندا بىرەۋدىڭ وتباسىن بۇزىپ، بالا تاۋىپ جاتقاندار كوبەيدى. ال ءبىرىنشى ايەلى مەن بىرنەشە بالاسىن تاستاپ كەتكەن ەرلەر ەلدىڭ قاھارىنا ۇشىرادى. بۇل رەتتە بيبىگۇل تولەگەنوۆا بالا- شاعاسىن تاستاپ كەتكەن ەرلەردى سىناپ تاستادى.

بۇل تۋرالى تولەگەنوۆا «استانا» ارناسىنىڭ «ەل اۋزىندا» باعدارلاماسىنا بەرگەن سۇحباتىندا ايتتى.

«قازاق بايىسا قاتىن الادى، وزبەك بايىسا ءۇي سالادى دەيدى. سول سياقتى ءبىزدىڭ قازاقتىڭ جىگىتتەرى بايىسا، بۇرىنعى 4-5 بالا تۋعان ايەلى وعان كەرەك بولماي قالادى. وعان جاسىراق كەرەك، كىشكەنە ادەمى بولۋ كەرەك. 1-2 بالا تۋعاننان كەيىن ونىڭ كىم بولاتىنىن ويلامايدى»، - دەيدى ول.

بيبىگۇل احمەت قىزىنىڭ ايتۋىنشا، قوعامدا بىرنەشە بالاسىن تاستاپ كەتەتىن ايەلدەر دە كوبەيگەن.

«3 ەمەس، 5-6 بالامەن تاستاپ كەتىپ جاتقانداردى دا كوردىك. قازىرگى زاماندا ايەلدەردىڭ وزدەرى دە تاستاپ كەتىپ جاتىر. ول ەندى سانگە اينالعان»، - دەيدى ول.

جالعىزباستى انالاردىڭ مۇڭىن تولەگەنوۆا جاقسى تۇسىنەدى. سەبەبى ءانشىنىڭ اناسى نەبارى 25 جاسىندا 7 بالامەن جالعىز قالعان. ول از دەسەڭىز، تولەگەنوۆانىڭ ءوزى دە ءۇش بالاسىن جالعىز ءوزى جەتكىزگەن.

«انامىز 7 بالامەن 25 جاسىندا قالدى، دالادا قالدى. اكەمىز 1937 -جىلى اتىلىپ كەتكەننەن كەيىن، ءبىزدى دالاعا قۋىپ شىقتى. كۇزدە تىزەگە دەيىن قار تۇسكەندە ءبىز انامىزبەن سۇيرەتىلىپ قاتون- قاراعايدان سەمەيگە كەلدىك. انامىز وتە كوپ قيىنشىلىق كوردى.

ال ەندى ءوزىمنىڭ جەكە ومىرىمدە دە باعىم اشىلعان جوق. ءۇش بالامەن جالعىز قالدىم، سول ءۇش بالانى جالعىز ءوزىم كوتەردىم. نە ىستەسەم دە، ايتەۋىر جۇمىس ىستەدىم، اسىرادىم، ءوسىردىم. سول بالالاردىڭ ءبارىن كوتەردىم، ءبارى دە ءبىلىم الدى. سوندىقتان بالالارىن تاستاپ كەتكەن جاس كەلىنشەكتەردى ويلايمىن، اۋەلى تاقىمىن قىسىپ وتىرۋ كەرەك قوي»، - دەيدى بۇلبۇل ءانشى.