اقمولا وبلىسىنداعى جەل ەلەكتر ستانسياسى 4,5 ميلليارد تەڭگەنىڭ ءونىمىن ءوندىردى

 استانا. قازاقپارات - ەرەيمەنتاۋ اۋدانىنداعى جەل ەلەكتر ستانساسى 193 ميلليون ك ۆ ت ەنەرگيا ءوندىردى. 1 جىل بۇرىن ىسكە قوسىلعان جوبا قازىر تولىق قۋاتىندا جۇمىس ىستەيدى. ونىڭ ۇستىنە جەرگىلىكتى قازىناعا قىرۋار پايدا ءتۇسىرىپ، تۇرعىنداردى تۇراقتى جۇمىسپەن قامتىپ وتىر.

بۇل -  سارى ارقانىڭ سايىن دالاسىندا ورنالاسقان ەلىمىزدەگى ەڭ العاشقى جەل ەلەكتر ستانساسى. ونىڭ ىسكە قوسىلىپ، تابيعي قۋات كوزىنەن ەلەكتر ەنەرگياسىن ءوندىرىپ جاتقانىنا 1 جىلدان استى. سودان بەرى ستانسا دامىلسىز سوققان جەلدىڭ كۇشىمەن تىنىمسىز جۇمىس ىستەپ تۇر.

 ەرلان جاقىپوۆ، باس ديرەكتوردىڭ ءوندىرىس جونىندەگى ورىنباسارى:

 - ءبىزدىڭ وسى جوبا 172 ميلليون ك ۆ ت ەلەكتر ەنەرگيا جىلىنا ءوندىرۋ كەرەك. ءبىز 14 ايدىڭ ىشىندە 193 ميلليون ك ۆ ت ەلەكتر قۋاتىن وندىردىك. 100 پايىز قۋاتىندا ىستەپ تۇر. ستانسا از عانا ۋاقىتتىڭ ىشىندە 4,5 ميلليارد تەڭگەنىڭ ءونىمىن ءوندىردى. ورتاشا ەسەپپەن سەكۋندىنا 20 مەترگە جۋىقتايتىن جەلدىڭ ەكپىنى مول پايداعا كەنەلتىپ كەلەدى.

 مۇندا تۇرعان 22 قوندىرعى كۇن سايىن 50 مىڭعا تارتا تۇرعىندى ەلەكتر قۋاتىمەن قامتاماسىز ەتە الادى.

ارمان قاشقىنبەكوۆ، «قازاقستاننىڭ جاڭارتىلعان ەنەرگەتيكاسى» قاۋىمداستىعى باسشىسىنىڭ ورىنباسارى:

- قازاقستاندا قازىر جاڭارتىلعان قۋات كوزىن وندىرەتىن ەكى ستانسا بار. سونىڭ ءبىرى -  وسى ەرەيمەنتاۋ اۋدانىنداعى جەل ەلەكتر ستانساسى. كەلەر جىلى ءبىزدىڭ ەلدە دۇنيەجۇزىلىك ەكسپو كورمەسى وتەدى. سوندىقتان وسى جوبانىڭ ماڭىزى زور. جالپى، ءبىزدىڭ ەلىمىز بۇل سالادا تۇراقتى دامىپ كەلەدى. رەسەيدىڭ ءوزى مۇنداي ەلەكتر ستانساسىن سالۋعا ەندى كىرىسىپ جاتىر.

 وسىلايشا جەلدەن قۋات الىپ وتىرعان مەكەمە استانا قالاسى مەن اقمولا وبلىسىنىڭ ءبىرقاتار ەلدى مەكەنىنە تابيعي تازا ءونىم بەرەدى. جوباعا جۇمسالعان قارجى دا قايتارىلا باستادى. ونىڭ ۇستىنە، ءار قوندىرعىنىڭ 20 جىل جۇمىس ىستەۋىنە كەپىلدىك بەرىلگەن. جالپى اۋماعى 50 گەكتاردان اساتىن اۋماقتا ورنالاسقان قوندىرعىلاردىڭ سانى الداعى ۋاقىتتا كوبەيە تۇسپەك. وسىلايشا ەرەيمەنتاۋ ايماعىن جەلدەن قۋات الاتىن الىپ ءوندىرىس ورنىنا اينالدىرۋ جوسپارى بار.