ون جىلدا جاپونيا قازاقستان ەكونوميكاسىنا 4,5 ميلليارد دوللار ينۆەستيتسيا قۇيدى
بۇل تۋرالى بۇگىن «ەنەرگيا بولاشاعى جانە جاپوندىق تەحنولوگيا» اتتى جاپوندىق- قازاقستاندىق ىنتىماقتاستىق جونىندەگى سەمينار بارىسىندا KAZENERGY قاۋىمداستىعى ءتوراعاسىنىڭ ورىنباسارى ۇزاقباي قارابالين ءمالىم ەتتى.
«2015 -جىلى ەكى ەلدىڭ اراسىنداعى تاۋار اينالىمى 1,5 ميلليارد دوللاردى قۇرادى. سوڭعى 10 -جىل ىشىندە قازاقستان ەكونوميكاسىنا سالىنعان جاپوندىق ينۆەستيتسيا كولەمى 4,5 ميلليارد دوللاردى قۇرادى»، - دەدى ۇ. قارابالين.
ونىڭ ايتۋىنشا، ينۆەستيتسيانىڭ نەگىزگى ۇلەسى ۋران ءوندىرۋ جانە ۋران ونىمدەرىن شىعارۋ سالالارىن قامتيدى. «دەگەنمەن ءبىزدىڭ ەلدەرىمىزدە ەنەرگەتيكالىق، مۇناي- گاز سالالارىندا، اسىرەسە ەنەرگيا تيىمدىلىگى مەن پارنيكتى گازدار شىعارىندىلارىن تومەندەتۋ سالالارىندا ىنتىماقتاستىقتىڭ زور الەۋەتى بار»، - دەدى ول.
سونىمەن قاتار ول بۇگىنگى جيىن الداعى ۋاقىتتاعى جاپونيا پرەمەر-ءمينيسترىنىڭ قازاقستانعا ساپارىنا مىعىم نەگىز قالايتىندىعىن، ەكى ەلدىڭ كومپانيالار اراسىنداعى سەرىكتەستىك بايلانىستاردى نىعايتاتىندىعىن باسا ايتتى.
اۆتور: مارلان جيەمباي
