قازاقستان «ەۋرو-4» جانە «ەۋرو-5» ستاندارتتى بەنزين شىعارادى - ق. بوزىمبايەۆ

استانا. قازاقپارات - قازاقستاندا «ەۋرو-4» جانە «ەۋرو-5» ستاندارتىنا سايكەس بەنزين شىعارىلادى.

بۇل تۋرالى بۇگىن حالىق الدىندا ەسەپ بەرگەن قازاقستان رەسپۋبليكاسىنىڭ ەنەرگەتيكا ءمينيسترى قانات بوزىمبايەۆ ءمالىم ەتتى.

«قازىرگى تاڭدا ەلىمىزدەگى ۇلكەن ءۇش مۇناي زاۋىتىندا مودەرنيزاتسيا جۇمىستارى ءجۇرىپ جاتىر. جاڭعىرتۋ ناتيجەسىندە قازاقستاندا «ەۋرو-4» جانە «ەۋرو-5» ستاندارتىنا سايكەس بەنزين شىعارىلادى. سونىمەن قاتار، ءبىز ىشكى جانارماي نارىعىن ساپالى بەنزينمەن قامتۋدى كوزدەپ وتىرمىز. بۇل ماسەلەلەردى ءبىز جان-جاقتى تالداپ، الداعى جىلدارعا جوسپار ازىرلەۋگە كىرىستىك»، - دەدى ق. بوزىمبايەۆ.

مينيستر اتاپ وتكەندەي، 2015-جىلدىڭ قورىتىندىسى بويىنشا، قازاقستاندا مۇناي مەن كوندەنسانت ءوندىرۋ كولەمى 79,5 ميلليون توننانى قۇراعان. «2016-جىلدىڭ العاشقى ءتورت ايىندا 26,2 ميلليون توننا مۇناي ءوندىرىلدى. وسىلايشا، ءبىز جوسپاردى 4 پايىزعا اسىرا ورىنداپ وتىرمىز. مۇناي باعاسىنىڭ ءوسۋى كومپانيالارعا وسى جىلدىڭ جوسپارىن اسىرۋعا مۇمكىندىك بەرەدى. حالىقارالىق ساراپشىلاردىڭ بولجامى بويىنشا، مۇنايدىڭ الەمدىك باعاسى تەك 2017-2018-جىلدارى باررەلى 60-65 دوللار دەڭگەيىندە بولادى. ءبىز مۇناي ءوندىرۋ كولەمى 2017-جىلى تۇراقتانادى دەپ بولجاپ وتىرمىز»، - دەدى بوزىمبايەۆ.

اۆتور: كەنجەكەي توقتامۇرات قىزى