قىتايدان 4,5 مىڭ جىل بۇرىن جەرلەنگەن ادام قاڭقاسى تابىلدى

استانا. قازاقپارات - قىتايدىڭ سىچۋان پروۆينسياسىندا جاقسى ساقتالعان ادام قاڭقالارى تابىلدى. بۇل تۋرالى 24..kz حابارلادى.

ساراپشىلاردىڭ ايتۋىنشا، تابىلعان ادام سۇيەكتەرى شامامەن 4,5 مىڭ جىل بۇرىن جەرلەنگەن. سونىمەن قاتار، ەسكى قورىمدار تاريحقا دەيىنگى قالا بولعان شيان جاۋ اۋىلىندا ورنالاسقان. ارحەولوگتار قاڭقالاردىڭ جاقسى ساقتالۋى ولاردىڭ سۋ دەڭگەيىنىڭ استىندا جاتىپ، اۋاعا شىقپاعاندىعىندا دەيدى.

بۇل مۇردەلەر نەوليت داۋىرىندەگى ادامداردىڭ دەنساۋلىق جانە تاماقتانۋ ەرەكشەلىكتەرى، سونداي- اق، اۋىز قۋىسىنىڭ اۋرۋلارى مەن ەمدامىنىڭ قۇرامىن زەرتتەۋگە كومەكتەسپەك.

ايتا كەتەيىك، بۇعان قوسا زيراتتاردان تاس جانە قىشتان جاسالعان بۇيىمدار، ءپىل سۇيەگىنەن جاسالعان 2 بىلەزىك سياقتى قۇندى مادەني جادىگەرلەر تابىلدى.

تالعات رايىمبەك.