تۇرىك تىلشىلەرى فرانسۋزدىڭ داۋلى جۋرنالىنان كاريكاتۋراسىن كوشىرىپ باسقانى ءۇشىن 4,5 جىلعا سوتتالۋى مۇمكىن

استانا. قازاقپارات - تۇرىك تىلشىلەرى Charlie Hebdo كاريكاتۋراسىن قايتا باسقانى ءۇشىن 4,5 جىلعا سوتتالۋى مۇمكىن، - دەپ حابارلايدى ر ي ا نوۆوستي. پروكۋرورلار Cumhuriyat گازەتىنىڭ كولۋمنيستەرى حيكمەت چەتينكاي مەن دجەيد كاراندى باس بوستاندىعىنان ايىرۋدى سۇرادى.

ولار ءوز ماقالالارىنا مۇحاممەد پايعامباردىڭ كاريكاتۋراسىن فرانسۋزدىڭ داۋلى جۋرنالىنان كوشىرىپ باسقان.

 Cumhuriyet باسىلىمىندا سۋرەت Charlie Hebdo جۋرنالىنداعى ارىپتەستەرىن قولداۋ ماقساتىندا قاڭتار ايىندا شىققان بولاتىن. تۇرىك جۋرنالى فرانسۋز اپتالىعىنىڭ لاڭكەستىكتەن كەيىن شىققان سانىنىڭ ءتورت بەتىن كوشىرىپ باسىپتى. چەتينكاي مەن كاران ءوز ماقالالارىندا مۇحاممەد پايعامبار سالىنعان كاريكاتۋرانى قولدانعان.

وسىدان كەيىن 1280 ادام قۇقىق قورعاۋ ورگاندارىنا حابار بەرىپ، تىلشىلەردى جازالاۋدى تالاپ ەتتى. ستامبۇل پروكۋراتۋراسى ايىپتاۋ قورىتىندىلارىن دايىپداپ، چەتينكاي مەن كاراندى «ءدىني قۇندىلىقتاردى جابىرلەگەنى» ءۇشىن جانە «ادامداردى وشپەندىلىك پەن جاۋگەرشىلىككە ايداپ سالعانى» ءۇشىن 1,5 - 4,5 جىل ارالىعىندا باس بوستاندىعىنان ايىرۋدى سۇرادى. سوتتىڭ قاشان وتەتىنى حابارلانباي وتىر.

ەسكە سالايىق، پاريجدە بولعان لاڭكەستىكتەر الەمدى ءدۇر سىلكىندىردى. Charlie Hebdo تىلشىلەرىنىڭ اتىلۋىنىڭ باستى سەبەبى دەپ مۇحاممەد پايعامباردىڭ كاريكاتۋراسى اتالدى. تاڭعى جينالىس كەزىندە ون ادام اتىلدى، تاعى ەكى ءتارتىپ ساقشىسى كوشەدە ءولتىرىلدى. پاريجدە بولعان لاڭكەستىكتەن كەيىن كۇدىكتىلەردىڭ كىم ەكەنى انىقتالىپ، قۇقىق قورعاۋ ورگاندارى ولاردىڭ كوزىن جويدى.