الماتىدا 4 كۇننىڭ ىشىندە 4 مىڭنان استام جۇرگىزۋشى جول ەرەجەسىن بۇزعان

الماتى. قازاقپارات - الماتىدا نەبارى 4 كۇننىڭ ىشىندە جول قوزعالىسى ەرەجەسىن بۇزعان 4092 جۇرگىزۋشى اكىمشىلىك جاۋاپكەرشىلىككە تارتىلدى.

بۇل تۋرالى بۇگىن الماتى قالاسى اكىمىنىڭ باسپا ءسوز قىزمەتىنەن حابارلادى.

 2015 -جىلدىڭ 14 - 17- جەلتوقسانى ارالىعىندا ق ر مەملەكەتتىك كۇزەت قىزمەتى مەن الماتى قالاسىنىڭ ىشكى ىستەر دەپارتامەنتى ءبىرقاتار رەيدتىك شارالار وتكىزدى.

اتالعان كۇندەر ارالىعىندا ءى ءى د جول قوزعالىسى قاۋىپسىزدىگىن بۇزعان 4092 ادامعا ءتۇرلى اكىمشىلىك شارالار قولداندى. سولاردىڭ ىشىندە 46 ادام كولىكتى ماس كۇيىندە ايداسا، 103 ادامنىڭ كولىگىندە مەملەكەتتىك ءنومىر بولماعان جانە 255 ادام كولىگىنىڭ تەرەزەلەرىن تۇمشالاپ العانى ءۇشىن اكىمشىلىك جاۋاپقا تارتىلدى.

«جول قوزعالىسى ەرەجەسىن بۇزۋدىڭ باستى فاكتورى - جەكەلەگەن جۇرگىزۋشىلەردىڭ تارتىپسىزدىگى. ولاردىڭ كەيبىرى جوعارى جىلدامدىقپەن جۇرسە، بىرەۋلەر جول بەلگىلەرىنە ءمان بەرمەيدى جانە ءتيىستى نورمالاردى ساقتامايدى. سوڭعى كەزدەرى جوعارى جىلدامدىقپەن جۇرگەنىن جاسىرۋ ءۇشىن كەيبىرەۋلەر كولىگىنىڭ الدىڭعى نومىرلەرىن الىپ تاستايتىن بولىپ ءجۇر»، - دەيدى قالانىڭ ءى ءى د-نىڭ وكىلدەرى.

كەيبىر جەكەلەگەن جۇرگىزۋشىلەر كولىك اينەكتەرىن كولەڭكەلەپ، جالپىعا ورتاق مىندەتتەردى بۇزىپ كەلەدى. ال ەڭ باستى قاۋىپ - ول كولىككە ماس كۇيدە وتىرۋ. سوندىقتان، الدىن الۋ شارالارىن كۇشەيتۋ قاجەت. ويتكەنى، قۇقىقتىق ءتارتىپ بارىمىزگە ورتاق.

ەستەرىڭىزگە سالا كەتەيىك، 2015 -جىلى الماتىدا جول قوزعالىسى ەرەجەسىن بۇزعانى ءۇشىن بارلىعى 308 مىڭ ازامات اكىمشىلىك جاۋاپقا تارتىلدى. ولاردىڭ 2153 ى كولىكتى ماس كۇيىندە جۇرگىزگەن، 3811 ادامنىڭ كولىگىندە مەملەكەتتىك ءنومىر بولماعان، ال 3929 جۇرگىزۋشىنىڭ كولىگىنىڭ تەرەزەلەرى تۇمشالانعان.

 

اۆتور: جاپپاربەرگەن ايبوتا