الداعى 4 جىلدا استانادا جاڭا 46 مەكتەپ سالىنباق

حالىقپەن ەسەپتىك كەزدەسۋ بارىسىندا اكىمنىڭ ورىنباسارى ەرمەك امانشايەۆ ءدال قازىرگى كەزدە 10 مىڭعا جۋىق ورىن جەتىسپەيتىنىن ايتتى. 2017-2018 وقۋ جىلىنىڭ باسىنان جۇكتەمەنى ازايتۋ ءۇشىن  2600 ورىندىق قوسىمشا 5 قۇرىلىس پايدالانۋعا بەرىلگەن بولاتىن ءارى جاڭا مەكتەپتەر دە سالىندى.

 « 10800 ورىنعا ارنالعان ون مەكتەپتىڭ قۇرىلىسى وقۋشىلاردىڭ ءبىلىم الۋىنا مول مۇمكىندىك جاسايدى»، -  دەدى ە. امانشايەۆ.

بولجام بويىنشا استانا حالقىنىڭ تۇرعىندارى كوشى- قون ەسەبىنەن جانە تابيعي ءوسىم جولىمەن كوبەيە تۇسپەك.

 «ەلدەگى ىشكى كوشى- قون وتە جوعارى. جىل سايىن استاناعا وزگە ايماقتاردان 40 مىڭعا جۋىق ازامات كوشىپ كەلەدى. وعان تابيعي ءوسىم دە قوسىلىپ جاتىر. استانادا كۇن سايىن 70-75 بالا تۋىلۋدا. بۇل دەگەنىڭ استانادا ءومىر ءسۇرۋ دەڭگەيى جوعارى ءارى ءبىلىم مەن مەديتسينا سالاسىندا ءتۇرلى قىزمەت كورسەتىلىپ جاتقانىن بىلدىرەدى»، -  دەدى ەرمەك امانشايەۆ.

وسىعان بايلانىستى الداعى 4 جىلدا استانادا جاڭا 46 مەكتەپ سالىنباق.

«2018 -جىلى  6900 ورىندىق جالپى ءبىلىم بەرەتىن التى مەكتەپتى پايدالانۋعا بەرۋ جوسپارلاندى. مەردىگەرلىك كەشەندى جوسپارعا سايكەس، استانادا 2022 -جىلعا دەيىن 46 مەكتەپ جانە 10 قوسىمشا جاپسارلاس سالىنعان ءبىلىم وشاعى قاجەت»، - دەيدى اكىم ورىنباسارى.

بۇگىندە قالادا  143264 وقۋشى بار، 95 جالپى ءبىلىم بەرەتىن مەكتەپ جۇمىس ىستەيدى.

قالا باسشىلارىنىڭ ەسەپتىك كەزدەسۋى 15 - اقپاندا باستالعان بولاتىن. بۇل «اشىقتىق جانە قوعام الدىندا ەسەپ بەرۋ» باعىتى بويىنشا وتكىزىلىپ جاتىر. «سۇراق - جاۋاپ» فورماتىنداعى كەزدەسۋدى استانا قالاسى اكىمىنىڭ ورىنباسارلارى سەرگەي حوروشۋن، قوسمان ايتمۇحامەتوۆ، ەرمەك امانشايەۆ وتكىزدى. قالالىقتار دا كەزدەسۋگە بەلسەنە قاتىسىپ، وزدەرىنىڭ وڭ پىكىرلەرىن بىلدىرۋدە.