ۋكراينادا قازىر 4 اۆتوبۋس كەپتەلىستە تۇر، ءار اۆتوبۋستا 40-50 قازاقستان ازاماتى بار - دارحان كالەتايەۆ
«اسكەري ارەكەتتەر ۋشىعىپ بارا جاتىر، جولدا كەپتەلىس. ەرتەڭ ۋكراينا- پولشا شەكاراسىنداعى بوسقىنداردىڭ سانى ميلليونعا جەتپەك. شەكاراداعى جاعدايعا كەلسەك، قازىر ءبىزدىڭ 4 اۆتوبۋس كەپتەلىستە تۇر. ءار اۆتوبۋستا 40-50 قازاقستاندىق بار. ازاماتتارىمىز مىنگەن ءبىرىنشى اۆتوبۋس پولشاعا جەتتى، ۇلكەن اۆتوبۋس بولعاندىقتان وندا 80 ادام بولدى»، - دەدى دارحان كالەتايەۆ. ونىڭ ايتۋىنشا، قازاقستاندىقتار مىنگەن 2 اۆتوبۋس شەكاراعا تاياپ قالدى.
«لۆوۆ قالاسىنان كيەۆكە تاعى 2 اۆتوبۋس وتانداستارىمىز جەتكىزىلدى. ولار شەكارا كەزەگىندە تۇر. ديپلوماتيالىق باعىت بويىنشا تەك ديپلوماتيالىق كولىكتەردى عانا جىبەرىپ جاتىر. پوليتسەيلەردىڭ قاراۋىلداۋىمەن قازاقستاندىق ديپلوماتيالىق ميسسيانىڭ 8 اۆتوكولىگى وتە الدى. ال قازاقستاندىقتار مىنگەن اۆتوبۋستاردى بىرگە الىپ شىعۋ مۇمكىن ەمەس. سەبەبى ديپلوماتيالىق ەمەس كولىكتەردى قاتاڭ تەكسەرىپ بارىپ جىبەرەدى. ءبىز قازاقستاندىقتاردى شەكاراعا جەتكىزۋ ءۇشىن ءنومىرى ۋكرايندىق اۆتوبۋستاردى جالدادىق، ولاردى ديپلوماتيالىق باعىت بويىنشا شىعارمايدى. ءبىز سوندا ەلشىلىك قىزمەتكەرلەرىنىڭ وتباسىن ۋكراينادا قالدىرىپ كەتۋىمىز كەرەك پە؟» - دەيدى ول.
ەلشىنىڭ مالىمەتىنشە، ۋكراينادان ديپلوماتيالىق باعىت ارقىلى شىققان كولىكتىڭ ىشىندە 25 ەلشىلىك قىزمەتكەرلەرى وتباسىنىڭ 25 مۇشەسى جانە 40 ەل ازاماتى بولعان.
