بيىل قازاقستاندا 4 ايدىڭ ىشىندە 21 مىڭ كيبەرقىلمىس تىركەلدى - دەپۋتات
نۇر- سۇلتان. قازاقپارات - 2022 -جىلدىڭ 4 ايىنىڭ قورىتىندىسى بويىنشا ەلىمىزدە 21 مىڭ كيبەرقىلمىس تىركەلگەن. سالىستىرىپ قاراساق، 2019 -جىلدىڭ قورىتىندىسى بويىنشا 7 مىڭ اتالعان قىلمىس ءتۇرى بولعان.
بۇل ماسەلەنى ق ر پارلامەنتى سەناتىنىڭ دەپۋتاتى نۇرلان بەكنازاروۆ كوتەرىپ وتىر، دەپ حابارلايدى قازاقپارات ءتىلشىسى.
«سيفرلاندىرۋ دامىپ جاتىر دەپ قۋانامىز. بۇل وڭ ءۇردىس. دەگەنمەن ونىڭ كەرى جاعى بارىن دا ۇمىتپاعان ءجون. ونىڭ زاردابىن جاستار دا تارتىپ جاتىر. مىسالى، سيفرلاندىرۋدىڭ ارقاسىندا قارجى پيراميدالارى پايدا بولىپ جاتىر، بىرەۋدىڭ اتىنان نەسيە راسىمدەۋ، ينتەرنەت الاياقتىق، بۋكمەكەرلىك ءباس تىگۋلەر، بۋللينگ، كيبەربۋللينگ دەپ كەتە بەرەدى. سونىڭ ىشىندە كيبەرقىلمىسقا جەكە توقتالسام. ستاتيستيكاعا سۇيەنسەك، بيىلعى جىلدىڭ 4 ايىندا ەلىمىزدە 21 مىڭ كيبەرقىلمىس تىركەلگەن. ال 2019 -جىلدىڭ قورىتىندىسىندا 7 مىڭ كيبەرقىلمىس بولعان. سوندا بيىل 4 ايدا 2019 -جىلمەن سالىستىرعاندا كيبەرقىلمىستىڭ دەڭگەيى 3-4 ەسەگە ءوسىپ وتىر»، - دەدى نۇرلان بەكنازاروۆ ەلورداداعى ەۋرازيا ۇلتتىق ۋنيۆەرسيتەتىنىڭ جۇرتشىلىعىمەن كەزدەسۋ بارىسىندا.
ونىڭ ايتۋىنشا، كيبەرقىلمىستىڭ ءوسۋىنىڭ نەگىزگى سەبەبى - ينتەرنەت.
«كيبەرقىلمىسپەن اينالىسۋشى كىمدەر دەگەن كەلسەك. ولار زەينەتكەرلەر ەمەس، مەملەكەتتىك قىزمەتكەرلەر ەمەس، دەپۋتاتتار ەمەس - ول ءبىزدىڭ جاستار. وسى ماسەلەسى ءبىزدى قاتتى تولعاندىرىپ وتىر. ۇكىمەت جاستاردىڭ بىلىممەن، جۇمىسپەن قامتۋعا ءبىرقاتار شارا اتقارىپ جاتىر. ەندىگى ۋاقىتتا جاستار جاعىنان دا ۇمتىلىس بولۋى كەرەك. ارينە، مەن بۇكىل جاستى قارالاۋدان اۋلاقپىن. دەگەنمەن جوعارىداعى ستاتيستيكاعا سايكەس، كيبەرقىلمىسقا باراتىنداردىڭ دەنى جاستار»، - دەيدى ول.
