جارتى جىلدا قازاقستان جالپى ىشكى ءونىمى 4,1 پايىز ءوستى
«ەكونوميكالىق پروتسەستەردىڭ دامۋى تەڭگەرىمدى ءوسۋ ارناسىندا تۇراقتى ساقتالۋدا. ەكونوميكالىق قىزمەتتىڭ بارلىق سەگمەنتتەرىندە دەرلىك وڭ سەرپىن بايقالىپ وتىر. اعىمداعى جىلعى ءبىرىنشى جارتىجىلدىقتىڭ قورىتىندىسى بويىنشا جالپى ىشكى ءونىمنىڭ ءوسۋى 4,1 پايىزدى قۇرادى. جالپى ەكونوميكانىڭ كوتەرىلۋى ينفلياتسيالىق پروتسەستەردىڭ جالعاسىپ كەلە جاتقان باسەڭدەۋى جانە جوعارى ينۆەستيتسيالىق بەلسەندىلىك اياسىندا بولىپ وتىر»، - دەدى مينيستر.
ونىڭ ايتۋىنشا، ينفلياتسيا بىرتىندەپ ازايىپ كەلە جاتىر جانە سوڭعى ءۇش جىلداعى ەڭ تومەن مانگە جەتتى. جىل باسىنان بەرى ول 2,6 پايىزدى قۇرادى. بۇل رەتتە جىلدىق ينفلياتسيا - 5,9 پايىز. ينفلياتسيانىڭ بارلىق كومپونەنتتەرى بويىنشا باعا ءوسۋىنىڭ باسەڭدەۋى بايقالادى.
«ونەركاسىپ ءوندىرىسى 5,2 پايىزعا ارتىپ، ءوسۋ قارقىنى ساقتالۋدا. تاۋ- كەن ونەركاسىبى 5,5 پايىزعا ءوستى. ءوسىم نەگىزىنەن قاشاعاندا مۇناي ءوندىرۋ جۇمىستارىنىڭ ايتارلىقتاي اسىرا ورىندالۋىنا بايلانىستى تۋىنداپ وتىر. جوسپارلانعان 4,9 ميلليون توننانىڭ ورنىنا 6,2 ميلليون توننا ءوندىرىلدى. وڭدەۋ ونەركاسىبى سەرپىنىنىڭ تۇراقتى ءوسۋى بايقالادى. جارتىجىلدىقتىڭ قورىتىندىسى بويىنشا ءوسۋ قارقىنى 5,2 پايىز بولدى»، - دەدى تيمۋر سۇلەيمەنوۆ.
ءمينيستردىڭ دەرەگىنشە، وڭدەۋ سالاسىنىڭ اراسىندا ەكى ماندىك ءوسۋ قاعاز ونىمدەرىن وندىرۋدە (12,0 پايىز)، حيميا ونەركاسىبىندە (%11,0) جانە ماشينا جاساۋدا (%17,2) ساقتالىپ وتىر. مەتاللۋرگيا (%3,4)، مۇنايدى قايتا وڭدەۋ (%4,4) جانە تاماق ونىمدەرىن ءوندىرۋ (5,2%) سياقتى وڭدەۋدىڭ باسقا دا ءىرى سالالارى بويىنشا وڭ ءوسىم ساقتالۋدا.
اۆتور: مارلان جيەمباي
