ەكسپو ءىسى: ت. ەرمەگيايەۆتىڭ سىبايلاستارى 4 جىلدان 10 جىلعا دەيىن باس بوستاندىقتارىنان ايىرىلدى

استانا. قازاقپارات - ەلوردادا «استانا ەكسپو-2017» ۇلتتىق كومپانياسىنىڭ بيۋدجەت قارجىسىن جىمقىرۋ ءىسى بويىنشا ءىستى بولعان فيگۋرانتتارعا قاتىستى سوت ۇكىمى شىقتى.

ادۆوكاتتار ول شەشىممەن كەلىسپەيدى جانە سوتقا اپپەلياتسيا بەرمەك.

ايان ادامبايەۆ، ورال ءيبادىلدينا مەن سۇلامبەك بەركىنحويەۆ ايىپتى دەپ تانىلىپ، 7 جىلعا باس بوستاندىقتارىنان ايىرىلدى. قۋانىش مەدەۋوۆ، مۇرات وماروۆ، ۆالەري سين - 8 جىلعا، ازامات تۇماتايەۆ - 10 جىلعا، شوقان ماتايبەكوۆ، الىشەر پىرمەتوۆ - 5 جىلعا، مادينا داۋلەتبايەۆا - 4 جىلعا سوتتالدى. ولاردىڭ مۇلىكتەرى دە تاركىلەنەتىن بولادى. سونىمەن قاتار ماتەريالدىق جاۋاپكەرشىلىگى جوعارى لاۋازىمداردى اتقارۋعا تىيىم سالىندى.

سوت بارىسىندا 100 دەن استام كۋاگەر تىڭدالدى.

«استانا ەكسپو-2017» ۇلتتىق كومپانياسىنىڭ بۇرىنعى باسشىسى تالعات ەرمەگيايەۆ استانا قالاسىنىڭ قىلمىستىق ىستەر جونىندەگى اۋدانارالىق مامانداندىرىلعان سوتىنىڭ ۇكىمىمەن 14  جىلعا باس بوستاندىعىنان ايىرىلعان بولاتىن. سونىمەن قاتار وعان ماتەريالدىق جاۋاپكەرشىلىگى جوعارى مەملەكەتتىك لاۋازىمدى يەلەنۋگە ءومىر بويىنا تىيىم سالىندى جانە «پاراسات» وردەنى قايتارىپ الىنادى.

قىلمىستىق ىسكە ءتوراعالىق ەتكەن سۋديا ءادىلحان شايحيسلاموۆ بۇگىن «استانا ەكسپو-2017» ۇلتتىق كومپانياسىنىڭ بۇرىنعى باسشىسى تالعات ەرمەگيايەۆكە قاتىستى سوت ۇكىمىن جاريا ەتتى.

ەستەرىڭىزگە سالا كەتەيىك، «استانا ەكسپو-2017» ۇلتتىق كومپانياسىنىڭ بۇرىنعى باسشىسىنا ق ر ق ك- نىڭ 176-بابىنىڭ 4-بولىگىندەگى «ب» تارماقشاسىندا قاراستىرىلعان اۋىر قىلمىستاردى بىرنەشە رەت قاساقانا جاسادى دەگەن كۇدىك كەلتىرىلگەن ەدى.

تالعات ەرمەگيايەۆ 2015 -جىلدىڭ 12 -ماۋسىمىنان بەرى ءۇيقاماقتا بولعان ەدى. ايىپتاۋشىنىڭ اقپاراتى بويىنشا، جىمقىرىلعان قاراجات كولەمى 10,2 ميلليارد تەڭگەنى قۇراپ وتىر. ونىمەن بىرگە 22 ادام سوت الدىندا جاۋاپ بەردى. ولاردىڭ نەگىزگى بولىگى كومپانيا قىزمەتكەرلەرى بولعان. قىلمىستىق ءىس 540 تومعا جەتىپ وتىر.

سوت بارىسىندا 12-ايىپتالۋشى تەرگەۋمەن كەلىسىمگە كەلگەن. 14-ايىپتالۋشى ءوز كىنالارىن موينىنا الدى. ەرمەگيايەۆتىڭ ءوزى كىنانى مويىنداۋدان باس تارتتى.

 اۆتور: جاسۇلان جولدىبايەۆ