قازاقستاندىق بانك ورتتەن كوز جۇمعانداردىڭ نەسيەسىن كەشىرىپ، وتباسىنا 3 ميلليون تەڭگەدەن بەرەدى

استانا. قازاقپارات - اباي وبلىسىنداعى ورمان ءورتى كەزىندە قايتىس بولعان جانداردىڭ وتباسىنا 3 ميلليون تەڭگە كولەمىندە قارجىلىق قولداۋ كورسەتىلەدى، دەپ حابارلايدى قازاقپارات.

«اباي وبلىسىنداعى ءورتتى ءسوندىرۋ كەزىندە قازا تاپقانداردىڭ وتباسىنا 3 ميلليون تەڭگە بەرىلەدى. Halyk Bank ورتتە قازا تاپقان ورمان شارۋاشىلىعى قىزمەتكەرلەرىنىڭ وتباسىنا قارجىلاي كومەك جىبەرەدى. سونىمەن قاتار ورتتە قازا تاپقان ازاماتتاردىڭ جانە ولاردىڭ وتباسى مۇشەلەرىنىڭ وسى بانكتەگى بار نەسيەسى ەسەپتەن شىعارىلادى»، - دەلىنگەن قارجى ۇيىمى تاراتقان حابارلامادا.

ەسكە سالا كەتەيىك، بۇگىن مەملەكەت باسشىسى جاعدايدى باقىلاۋ ماقساتىندا اباي وبلىسىنا باردى.

ايتا كەتەيىك، اباي وبلىسىنداعى ورتتەن كوز جۇمعان ورمانشىلاردىڭ ءتىزىمى جاريالاندى.

قازىر سەمەي ورمانىندا 1500 ادام جانە 300 گە جۋىق تەحنيكا بەس ۋچاسكەدە ءورت ءسوندىرىپ جاتىر.