كولۋمبياداعى ۇشاق اپاتى: 3 بالا مەن نارەستە ەكى اپتادان سوڭ تابىلدى
بالالاردى كاكەتا پروۆينتسياسىنىڭ قالىڭ ورمانىنان اسكەريلەر، ءورت ءسوندىرۋ جانە ازاماتتىق اۆياتسيا وكىلدەرىنەن جاساقتالعان قۇتقارۋ توبى تاپتى.
1-مامىر كۇنى تاڭەرتەڭ اراراكۋارادان سان- حوسە- دەل- گۋاۆيارەگە باعىت العان «Cessna 206» ۇشاعى قوزعالتقىشتىڭ ىستەن شىعۋىنا بايلانىستى اپاتتىق دابىل جاريالاعان. ۇشاقتا جەتى ادام بولعان.
«اسكەريلەردىڭ ىجداعاتتى ىزدەستىرۋ شارالارىنان كەيىن گۋاۆياردەگى ۇشاق اپاتىندا جوعالعان ءتورت بالانى امان تاپتىق. بۇل بۇكىل ەل ءۇشىن قۋانىش»، - دەپ جازدى ەل پرەزيدەنتى گۋستاۆو پەتر سارسەنبى كۇنى Twitter- دەگى پاراقشاسىندا.
وكىنىشكە وراي، اپات سالدارىنان ۇشقىش پەن تاعى ءۇش ەرەسەك ادام قازا تاپتى. ولاردىڭ ءمايىتى اۋە كەمەسىنىڭ ىشىنەن تابىلدى. 13, 9 جانە 4 جاستاعى ءۇش بالا مەن 11 ايلىق نارەستە امان قالدى.
قۇتقارۋ جۇمىسىن ۇيلەستىرگەن ازاماتتىق اۆياتسيا باسقارماسىنان الىنعان الدىن الا اقپاراتقا سايكەس، بالالار ۇشاقتان شىعىپ، كومەك ىزدەۋگە اتتانعان.
قۇتقارۋشى يتتەردىڭ كومەگىمەن ورماندا بالالار جەگەن جەمىس قالدىعى، وسىمدىكتەردەن قورعانىش ءۇشىن جاسالعان كۇركەلەر تابىلدى. قۇتقارۋ جۇمىسىنا اسكەريلەرمەن قاتار، كولۋمبيا اۋە كۇشتەرىنىڭ بىرنەشە ۇشاعى مەن تىكۇشاعى جۇمىلدىرىلدى.
