قاجىلىققا باراتىن ادامداردى 3 اۋە كومپانياسى تاسىمالدايتىن بولدى
قاجىلارىمىزعا قولايلى جاعداي جاساۋ ماقساتىندا ق م د ب قازاقستاندىق جانە شەتەلدىك اۋەكومپانيالار اراسىندا 4000 قاجىنى تاسىمالداۋ ءۇشىن اشىق كونكۋرس جاريالاعان بولاتىن.
كونكۋرسقا كۋۆەيتتىڭ «Jazeera»، بىرىككەن اراب امىرلىگىنىڭ «Air Arabia»، تۇركيانىڭ «Turkish Airlines»، سونداي-اق ساۋد ارابياسىنىڭ «Flynas» اۋە كومپانيالارى قىزىعۋشىلىق ءبىلدىرىپ، ءتيىستى قۇجاتتارىن وتكىزدى.
وسى رەتتە، قاجىلىق ورىندارىن العان 18 قازاقستاندىق تۋروپەراتور اراسىنان ارنايى كوميسسيا قۇرىلىپ، اتالعان اۋە كومپانيالار وكىلدەرىمەن ءتيىستى كەلىسسوزدەر جۇرگىزىلدى.
باسەكەلەستىككە تۇسكەن «Flynas» اۋە كومپانياسى دا كەلىسسوزدەر ناتيجەسىندە ارزان باعا ۇسىندى. اتالمىش كوميسسيا مۇشەلەرى 3 اۋە كومپانياسىن تاڭداپ الدى. اتاپ ايتقاندا تىكەلەي رەيستەرى ارقىلى قاجىلارىمىزدىڭ قاسيەتتى مەكەنگە جىلدام جەتۋى ءۇشىن «Flynas» اۋە كومپانياسى تاڭدالدى. ال، ارزان اۋە بيلەتىن قالاعان تۋروپەراتورلار ءۇشىن «Jazeera» اۋە كومپانياسى قىزمەت كورسەتەتىن بولدى. الەمنىڭ وزىق ۇلگىدە قىزمەت كورسەتەتىن اۋە كومپانيالارىنىڭ قاتارىنا كىرەتىن «Turkish Airlines» اۋە كومپانياسى جايلىلىقتى قالاعان قاجىلارىمىز ءۇشىن تاڭدالدى.
ق م د ب اۋە كومپانيالارى اراسىنداعى كونكۋرس پەن بيىلعى 4000 قازاقستاندىق قاجىنى تاسىمالدايتىن اۋە كومپانيالارىنىڭ تاڭدالعاندىعى جايلى ساۋد ارابيا كورولدىگىنىڭ قاجىلىق جانە ۇمرا مينيسترلىگى مەن كورولدىكتىڭ ازاماتتىق اۆياتسيا باس باسقارماسى تاراپىنا ديپلوماتيالىق ارنالار ارقىلى رەسمي حابارلانعان بولاتىن.
قازاقستان تاراپىنان «قاجىلىق-2023» ماۋسىمىن ۇيىمداستىرۋ بويىنشا ارنايى ءىس-ساپارمەن بارعان قازاقستان مۇسىلماندارى ءدىني باسقارماسىنىڭ ءتوراعا ورىنباسارى، نايب ءمۇفتي ەرشات وڭعار مەن قازاقستاننىڭ جيددا قالاسىنداعى باس كونسۋلى قوسپانوۆ رۋسلان توبىل ۇلى ال، ساۋديا تاراپىنان كورولدىكتىڭ ازاماتتىق اۆياتسيا باس باسقارماسىنىڭ (GACA) قاجىلىق جانە ۇمرا ىستەرى بويىنشا باسقارما باسشىسى مازەن احماد بازھاير مىرزا قاتىسقان كەلىسسوزدەر جۇرگىزىلدى.
كەلىسسوز بارىسىندا قازاقستاندىق 18 تۋروپەراتورمەن قاجىلىققا اتتاناتىن 4000 وتانداسىمىزدى ق م د ب وتكىزگەن كونكۋرس نەگىزىندە ساۋديالىق «Flynas»، كۋۆەيتتىك «Jazeera»، تۇركيالىق «Turkish Airlines» اۋە كومپانيالارى تاسىمالدايتىنى پىسىقتالدى. قاجىلارىمىز استانا، الماتى، تۇركىستان جانە اقتاۋ قالالارىنان ۇشاققا وتىرىپ، مەككە (جيددا) جانە مەدينە قالالارىنا جەتكىزىلەتىن بولادى.