بىلتىر ماشينا جاساۋ سالاسىندا قۇنى 3 تريلليون تەڭگەدەن اساتىن ءونىم ءوندىرىلدى - پرەزيدەنت
پلەنارلىق وتىرىستىڭ اشىلۋىندا ق ر پرەمەر- ءمينيسترى ءاليحان سمايىلوۆ مەملەكەت باسشىسى قاسىم- جومارت توقايەۆتىڭ قۇتتىقتاۋ ءسوزىن وقىپ بەردى.
«قۇرمەتتى جيىنعا قاتىسۋشىلار! سىزدەردى قازاقستان ماشينا جاساۋشىلارىنىڭ XI فورۋمىنىڭ اشىلۋىمەن قۇتتىقتايمىن! بۇل فورۋم وسى سالانى وركەندەتۋگە ىقپال ەتەتىن تىڭ تاسىلدەر تابۋعا ارنالعان ءتيىمدى ديالوگ الاڭىنا اينالدى. ەل ەكونوميكاسىن ءارتاراپتاندىرۋ ءۇشىن يننوۆاتسياعا جانە وزىق تەحنولوگياعا نەگىزدەلگەن وڭدەۋ ونەركاسىبىن قارقىندى دامىتۋ وتە ماڭىزدى. وسى ستراتەگيالىق ماقساتقا جەتۋ جولىندا ماشينا جاساۋ ءوندىرىسى ايرىقشا ءرول اتقارادى. بىلتىر بۇل سالادا جالپى قۇنى 3 تريلليون تەڭگەدەن اساتىن ءونىم ءوندىرىلدى. تاۋار تۇرلەرى، ەكسپورت كولەمى كوبەيدى، مىڭداعان جۇمىس ورنى اشىلدى. وعان كاسىپورىن ۇجىمدارىنىڭ قاجىرلى ەڭبەگى، مەملەكەتتىڭ ورنىقتى ساياساتى جانە اۋقىمدى قولداۋ شارالارى زور سەپتىگىن تيگىزدى»، - دەپ جازىلعان پرەزيدەنت قۇتتىقتاۋىندا.
مەملەكەت باسشىسى ماشينا جاساۋ ونەركاسىبىنە ينۆەستيتسيا سالۋعا قولايلى جاعداي جاساپ، ونىڭ باسەكەگە قابىلەتىن ارتتىرۋ قاجەتتىگىن باسا ايتتى.
«سول ءۇشىن مەنىڭ تاپسىرماممەن كەشەندى جوسپار جوباسى ازىرلەندى. وندا كورسەتىلگەن ءىس- شارالاردىڭ تابىستى جۇزەگە اسىرىلۋى وسى سالانىڭ تىڭ قارقىنمەن دامۋىنا جانە ەلىمىزدىڭ وركەندەۋىنە بارىنشا ىقپال ەتەدى دەپ سەنەمىن. ءوز ءوندىرىسىمىزدى جانداندىرۋ، تەرەڭ وڭدەلگەن ونىمدەردى كوبىرەك شىعارۋ جانە بىرتىندەپ سىرتقى نارىقتارعا شىعۋ - ءبىزدىڭ باستى مىندەتىمىز. سىزدەر بۇل مىندەتتى ابىرويمەن ورىنداي الاتىندارىڭىزعا سەنىمدىمىن. فورۋم جۇمىسىنا تابىس تىلەيمىن! ەڭبەكتەرىڭىز جەمىستى بولسىن»، - دەلىنگەن قاسىم- جومارت توقايەۆتىڭ قۇتتىقتاۋ سوزىندە.