قازاقستان ەۋروپا ەلدەرىنە قاراعاندا 3 ەسە كوپ سۋ جۇمسايدى

استانا. قازاقپارات – ق ر ي ي د م قۇرىلىس جانە تۇرعىن ءۇي-كوممۋنالدىق شارۋاشىلىق ىستەرى كوميتەتى ءتوراعاسىنىڭ ورىنباسارى ازىمبەك پازىلبەك ۇلى ەلدە سۋ تۇتىنۋ مادەنيەتى قالىپتاسپاعانىن سىنعا الدى، دەپ حابارلايدى قازاقپارات ءتىلشىسى.

«اۋىز سۋ تاپشىلىعى سەبەپتەرىنىڭ ءبىرى - سۋعا نەمقۇرايلى قاراۋ. مەملەكەت باسشىسى سۋ رەسۋرستارىن ۇتىمدى پايدالانۋ كوبىنەسە سۋ تۇتىنۋ مادەنيەتىنە بايلانىستى ەكەنىن ايتقان ەدى، وكىنىشكە وراي بىزدە ول مادەنيەت جوق. جەكە تۇتىنۋدا ءبىز ەۋروپا ەلدەرىنە قاراعاندا ءۇش ەسە كوپ سۋ جۇمسايمىز. قازاقستان - سۋ تاپشىلىعى بار مەملەكەت. سوندىقتان ەرتە جاستان باستاپ سۋعا دەگەن ۇقىپتىلىقتى قالىپتاستىرۋ قاجەت»، - دەدى سپيكەر ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا.

سونىمەن قاتار، تاريفتەردى قالىپتاستىرۋداعى الەۋمەتتىك ءتاسىل سۋ ارنالارىن قارجىلاندىرۋدىڭ جەتىسپەۋشىلىگىنە جانە سۋمەن جابدىقتاۋ جۇيەلەرىنىڭ تەز توزۋىنا الىپ كەلەدى.

ءوز كەزەگىندە، بۇل سۋ ىسىرابىنىڭ ورىن الۋىن، اپاتتار سانىنىڭ ارتۋىن جانە سۋ ساپاسىنىڭ ناشارلاۋىن تۋعىزىپ وتىر.

«سۋ رەسۋرستارىن ۇنەمدەۋ ءۇشىن سۋمەن جابدىقتاۋ، سۋ بۇرۋ جۇيەلەرىنىڭ وندىرىستىك پروتسەستەرىن اۆتوماتتاندىرۋ جوسپارلانۋدا. وسىلاي بۇكىل وندىرىستىك پروتسەسستەردەگى سۋ رەسۋرستارىن ەسەپكە الۋدىڭ تولىق كەشەنىمەن قامتاماسىز ەتۋ كوزدەلۋدە. ول ءۇشىن سۋمەن جابدىقتاۋ، سۋ بۇرۋ جۇيەلەرىنىڭ گيدرومودەلىن جاساۋ ءۇشىن بارلىق وندىرىستىك ۋچاسكەلەردە سۋ ەسەپتەۋ قۇرالدارىن ورناتۋ قاجەت»، - دەدى ءا. پازىلبەك ۇلى.

اۆتوماتتاندىرۋ سۋ ارناسىنىڭ الداعى شىعىندارىن، سونداي-اق دامۋدىڭ وڭتايلى مودەلدەرىن قۇرۋ ارقىلى سۋمەن جابدىقتاۋ جانە سۋ بۇرۋ جۇيەلەرىن سالۋ مەن رەكونسترۋكتسيالاۋعا باعىتتالعان مەملەكەتتىك بيۋجەتتى وڭتايلاندىرۋعا مۇمكىندىك بەرەدى.

رەسپۋبليكالىق ماڭىزى بار قالالار مەن وبلىس ورتالىقتارىندا وسى جۇمىستاردى جۇرگىزۋ ءۇشىن بيۋجەتتەن شامامەن 25 ميلليارد تەڭگە قاجەت.