اڭساعان ءسابي: الماتىدا 3 مىڭنان اسا ايەل ەكوۇرىقتاندىرۋ ارقىلى بالا ءسۇيدى

الماتى. قازاقپارات - بىلتىر 3010 ايەلگە ساقتاندىرۋ ەسەبىنەن ەكۇ جاسالدى. بۇل تۋرالى بريفينگ بارىسىندا الماتى قالاسىنىڭ الەۋمەتتىك مەديتسينالىق ساقتاندىرۋ قورىنىڭ ديرەكتورى تىلەۋحان ابىلدايەۆ ءمالىم ەتتى، دەپ حابارلايدى قازاقپارات ءتىلشىسى.

«ق ر پرەزيدەنتى قاسىم-جومارت توقايەۆتىڭ تاپسىرماسى بويىنشا ەلدە «اڭساعان ءسابي» باعدارلاماسى جۇمىس ىستەپ جاتىر. جىل سايىن ەكستروكورپورالدى ۇرىقتاندىرۋ، ياعني ەكو پروتسەدۋراسىنا قاراجات بولىنەدى. 2022-جىلدىڭ سوڭىندا الماتىدا 3,4 ميلليارد تەڭگەگە ەكستراكورپورالدى ۇرىقتاندىرۋدىڭ 3010 پروتسەدۋراسى جاسالدى. قازىر قالادا مەديتسينالىق ساقتاندىرۋ قورىمەن جاسالعان كەلىسىم بويىنشا بۇل قىزمەتتەردى جەتى مەديتسينالىق ۇيىم كورسەتەدى»، - دەدى تىلەۋحان ابىلدايەۆ.

ايتۋىنشا، ەكو پروتسەدۋراسى جوعارى تەحنولوگيالىق مەديتسينالىق قىزمەتتەرگە جاتادى جانە قىمبات. بۇرىن بۇل تەگىن مەديتسينالىق كومەكتىڭ كەپىلدىك بەرىلگەن كولەمى اياسىندا جۇزەگە اسىرىلىپ كەلگەن.

«الايدا قارجىلاندىرۋ ماردىمسىز بولدى، جىلىنا 900-1000 عا جۋىق كۆوتا ءبولىندى. ال 2021-جىلدان باستاپ مەملەكەت باسشىسىنىڭ تاپسىرماسىنا سايكەس، كۆوتالار سانىن جەتى ەسەگە - جىلىنا 7 مىڭعا دەيىن ارتتىرۋعا مۇمكىندىك بەردى. پروتسەدۋرا م ءا م س قىزمەتتەرىنىڭ تىزىمىنە ەنگىزىلگەن، سوندىقتان ساقتاندىرىلعان پاتسيەنتتەر ونى تەگىن وتە الادى»، - دەپ اتاپ ءوتتى سپيكەر.

بۇعان دەيىن الەۋمەتتىك مەديتسينالىق ساقتاندىرۋ قورىنىڭ وكىلدەرى، ەكۇ كۆوتاسىن قالاي الۋعا بولاتىنىن ايتقان ەدى.