وڭتۇستىك كورەيادا 3 قازاقستاندىق تۇتقىندالدى
بۇل تۋرالى سىرتقى ىستەر مينيسترلىگىنىڭ رەسمي وكىلى ايبەك سمادياروۆ ءمالىم ەتتى، دەپ حابارلايدى قازاقپارات ءتىلشىسى.
«كورەيا رەسپۋبليكاسىنىڭ يمميگراتسيالىق بيلىگى اقپاراتىنا سايكەس، 12- اقپان كۇنى قازاقستاننىڭ ءۇش ازاماتى ۇستالدى. ونىڭ ەكەۋى تۇتقىنعا الىنىپ، ءۇشىنشىسى ەلدەن كەتپەۋ تۋرالى قولحاتپەن بوستاندىققا جىبەرىلدى. اتالعان ماسەلەگە قاتىستى ءىس جەرگىلىكتى پروكۋراتۋراعا جولدانعان. ازاماتتار بوسقىن مارتەبەسىن الۋعا ارنالعان وتىنىمگە جالعان تاريح جاساۋ جانە الەۋمەتتىك جەلى ارقىلى شەتەلدىكتەرگە، ونىڭ ىشىندە قازاقستان ازاماتتارىنا جەكەلەگەن قۇجاتتاردى دايىنداۋ كۇدىگىنە ىلىگىپ وتىر»، - دەدى رەسمي وكىل ۆەدومستۆودا وتكەن اپتالىق بريفينگ بارىسىندا.
ونىڭ اتاپ وتۋىنشە، تەرگەۋ بارىسىندا ولاردىڭ كورەيا اۋماعىندا تۇراتىن بىرنەشە شەتەلدىككە بوسقىن مارتەبەسىن بەرۋ تۋرالى ءوتىنىمدى وتىرىك بەرگەن.
«وڭتۇستىك كورەيانىڭ قۇقىق قورعاۋ ورگاندارى «جەكە مالىمەتتەردى قورعاۋ تۋرالى» كورەي زاڭىنا سايكەس قازاقستان ەلشىلىگىنە ۇستالعاندار تۋرالى جەكە مالىمەتتەردى جانە وزگە دە اقپاراتتاردى بەرۋدەن باس تارتتى. بۇعان قوسا، ۇستالعان قازاقستان ازاماتتارى سەۋلدەگى ەلشىلىگىمىزگە جۇگىنگەن جوق جانە ەلشىلىك قىزمەتكەرلەرىنە اقپارات بەرۋگە مۇددەلى ەمەس»، - دەدى ايبەك سمادياروۆ.
