11:38, 13 - اقپان 2023 | GMT +6
يدەولوگيالىق تۇرعىدان ەسكىرگەن 3 مىڭعا جۋىق ونوماستيكالىق اتاۋ الماستىرىلادى
استانا. قازاقپارات - يدەولوگيالىق تۇرعىدان ەسكىرگەن اتاۋلاردى قايتا اتاۋ جونىندەگى 2022−2025 -جىلدارعا ارنالعان جول كارتاسىنىڭ اياسىندا 3 مىڭعا جۋىق ونوماستيكالىق اتاۋ الماستىرىلادى، دەپ حابارلايدى قازاقپارات ءتىلشىسى.
بۇل جايىندا ق ر پرەمەر- ءمينيسترىنىڭ ورىنباسارى التاي كولگىنوۆتىڭ سەنات دەپۋاتتاىنىڭ ساۋالىنا جولداعان جاۋابىندا ايتىلعان.
«بىلتىردان بەرى يدەولوگيالىق تۇرعىدان ەسكىرگەن اتاۋلاردى قايتا اتاۋ جونىندەگى 2022 − 2025 -جىلدارعا ارنالعان جول كارتاسى ىسكە اسىرىلۋدا. جول كارتاسىنىڭ اياسىندا 2021 -جىلى 68 ەلدى مەكەن مەن ولاردىڭ 572 قۇرامداس بولىگىنىڭ اتاۋلارى وزگەرتىلدى. جالپى جول كارتاسىنىڭ شەڭبەرىندە 3 مىڭعا جۋىق ەسكىرگەن اتاۋلاردى الماستىرۋ جوسپارلانعان»، - دەپ جازىلعان ۆيتسە- پرەمەردىڭ جاۋابىندا.
بۇعان دەيىن استانا ماڭىنداعى لەسنايا پوليانانىڭ اتاۋى وزگەرۋى مۇمكىن ەكەنى حابارلانعان بولاتىن.
اۆتور
ەسىمجان ناقتىباي