ورتالىق ازيانىڭ ەكونوميكاسى دەموگرافيالىق وسىمىنەن 3 ەسە ارتتا كەلەدى - ەركىن تۇقىموۆ
«مەن ورتالىق ازيا ءۇشىن ستراتەگيالىق بەلگىسىزدىكتى ەڭ ءبىرىنشى ورىنداعى قاتەرگە جاتقىزار ەدىم. بۇكىل الەمدە ستراتەگيالىق بەلگىسىزدىك ارتىپ تۇر. مەنىڭ ويىمشا، بۇل بازالىق تەندەنتسيا ءبىزدىڭ وڭىرگە دە اسەر ەتەدى. بۇل جاقسى ما، الدە جامان با دەگەنگە كەلسەك، ەكىۇداي ماسەلە. ويتكەنى، ءبىر جاعىنان الەمنىڭ جىلدام وزگەرىپ جاتقانى سونشالىق، ءبىر عانا بۋىننىڭ باسىنان ىرگەلى وزگەرىستەر ءوتىپ جاتىر. بۇرىن ونداي وزگەرىستەر جۇزدەگەن جىلدارعا سوزىلاتىن»، - دەيدى ساراپشى.
ونىڭ پايىمىنشا، ءدال قازىر ورتالىق ازيا ەلدەرىنە ستراتەگيالارىن قايتا ءبىر پىسىقتاپ الۋ قاجەت.
«ءبىزدىڭ ءوڭىر ءۇشىن ەڭ ماڭىزدى ينتەللەكتۋالدىق قاتەر ءوز قاتەلىكتەرىمىز بەن مۇمكىندىكتەرىمىزدى قانشالىقتى دۇرىس تارازىلاي العانىمىزدا سياقتى.
ءبىز مىناۋ قۇبىلمالى الەمگە ەكونوميكامىزدى، ساياسي جۇيە مەن قاۋىپسىزدىك جۇيەسىن دۇرىس بەيىمدەي الدىق پا؟ ءوز ستراتەگيالارىمىزدى دۇرىس تاڭداي الدىق پا؟ ەگەر دۇرىس تاڭداپ، بەيىمدەي الماساق، ەرتەڭ كۇتپەگەن «قارا اققۋلار» عانا ەمەس، بۇرىننان بەلگىلى بولعان، ءبىراق ەشكىمنىڭ ەلەۋگە مۇرشاسى بولماعان «سۇرى ءمۇيىزتۇمسىقتار» تابىن-تابىنىمەن قاپتاۋى مۇمكىن. ءتىپتى ءبىزدىڭ تۇتاس سۋبەكتىلىگىمىزدىڭ ماسەلەسى تۋىنداۋى ىقتيمال. ءبىر عانا مىسال، الەمدىك اۋقىمدا بىزدەگى ءوڭىر حالقىنىڭ سانىن پايىزعا شاققاندا 1 پايىز عانا بولسا، بۇكىل ەكونوميكامىزدىڭ جيىنتىق سالماعى 0,3 پايىز عانا. ياعني، ەكونوميكا بويىنشا دەموگرافيالىق وسىمنەن كەمىندە ءۇش ەسە ارتتا كەلە جاتىرمىز. دەمەك، قازىردىڭ وزىندە ستراتەگيالارىمىز تۋرالى ويلانا باستاۋ كەرەك. جالپى شيكىزات ەكسپورتتاۋشى مودەل اياقتالىپ كەلە جاتىر. ونىڭ ءتيىمسىز ەكەنىن ءتۇسىنىپ وتىرمىز. ول ءبىزدىڭ ىشكى ونىمگە ارى كەتسە 1-3 پايىز عانا ۇستەمە قوسا الاتىن شىعار. بۇل دەگەنىمىز جاڭا قۇرىلىمدىق رەفورمالار جۇرگىزۋ قاجەتتىگىن كورسەتەدى»، - دەدى ق س ز ي ديرەكتورى.
