قازاقستاندا جەكە ادامدار بانكروتتىعىنىڭ 3 ءراسىمى قولدانىلماق

«زاڭ جوباسىن ازىرلەۋ بارىسىندا جەكە تۇلعالاردىڭ بانكروتتىعى ينستيتۋتى قالىپتاسقان ەلدەردىڭ وزىق تاجىريبەسىن سارالاپ، وڭتايلى نورمالارىن نازارعا الدىق. وسى ورايدا حالىقارالىق تاجىريبەنى ەسكەرە وتىرىپ، راسىمدەردىڭ 3 ءتۇرىن ەنگىزۋدى ۇسىنىپ وتىرمىز. ءبىرىنشى ءراسىم سوتتان تىس بانكروتتىق ءىس-شارالارىنا قاتىستى. وعان ازاماتتار ءتيىستى شارتتار بويىنشا ءوتىنىش بەرە الادى. اتاپ ايتقاندا، بانكتەر، ميكروقارجىلىق ۇيىمدار مەن كوللەكتورلار الدىنداعى بەرەشەك 4,9 ميلليون تەڭگەدەن اسپاسا، سونداي-اق رەسمي كىرىسى جوق نەمەسە ەڭ تومەنگى كۇنكورىس دەڭگەيىنەن اسپايتىن تابىسى بولسا (36018 تەڭگە) سوتتان تىس ءراسىم ىسكە اسىرىلادى. بۇل رەتتە بورىشكەردىڭ مۇلكى بولماۋى كەرەك جانە قارىزدار بويىنشا بانكپەن ءتيىستى راسىمدەردى جۇرگىزۋى قاجەت»، - دەدى ق ر پرەمەر-ءمينيسترىنىڭ ورىنباسارى-قارجى ءمينيسترى ەرۇلان جاماۋبايەۆ.

ونىڭ ايتۋىنشا، سوتتان تىس بانكروتتىق تەك بانكتەر، ميكروقارجىلىق ۇيىمدار جانە كوللەكتورلىق اگەنتتىكتەر الدىنداعى قارىزدار بويىنشا قولدانىلۋى مۇمكىن. بۇل تۇرعىدا «ەلەكتروندىق ۇكىمەت» ۆەب-پورتالىندا نەمەسە ارنايى سەرۆيستىك قوسىمشالار ارقىلى ءوتىنىم بەرىلەدى.

«سودان كەيىن، اقپاراتتىق جۇيە ارقىلى بورىشكەردىڭ كىرۋ كريتەريلەرىنە سايكەستىگىن انىقتاۋ ماقساتىندا مۇددەلى مەملەكەتتىك جانە باسقا ورگانداردىڭ دەرەكتەرىمەن اۆتوماتتى تۇردە سالىستىرۋ جۇرگىزىلەتىن بولادى. سوماسى 4,9 ميلليون تەڭگەدەن اساتىن قارىزدار بويىنشا جانە باسقا دا بەرەشەك تۇرلەرى بويىنشا ازاماتتار سوت بانكروتتىعىنا جۇگىنە الادى.

بۇل ءراسىم بارىسىندا بورىشكەردىڭ مۇلكى ساتىلادى. تۇسكەن قاراجات بەلگىلەنگەن كەزەكپەن كرەديتورلار الدىنداعى قارىزداردى وتەۋگە جۇمسالادى. ەگەر جالعىز تۇرعىن ءۇي كەپىل زاتى بولىپ تابىلسا، وندا كرەديتور ونى سوتتىڭ بانكروتتىق ءراسىمى كەزىندە الۋعا قۇقىلى. جالعىز باسپانا كەپىل بولماسا، كرەديتورلار ونى تالاپ ەتە المايدى»، - دەدى مينيستر.

سوت بانكروتتىعى ءراسىمىن قارجى باسقارۋشىلارى جۇزەگە اسىرادى. ولار:

• كاسىبي بۋحالتەرلەر؛

• زاڭ كونسۋلتانتتارى؛

• اۋديتورلار.

«ءۇشىنشى ءراسىم - ول تولەم قابىلەتتىلىگىن قالپىنا كەلتىرۋ ءتارتىبى، ياعني، تۇراقتى تابىس بولعان جاعدايدا، قارىزدى وتەۋ ءۇشىن سوت تارتىبىمەن ءبولىپ تولەۋ جوسپارىن الۋ مۇمكىندىگىن قاراستىرادى. قالپىنا كەلتىرۋ جوسپارى قارجى باسقارۋشىلارمەن بىرلەسىپ ازىرلەنىپ، سوتپەن بەكىتىلەدى»، - دەدى ۆەدومستۆو باسشىسى.

«جالپى، بانكروتتىقتىڭ سالدارىنا توقتالساق، قۇجاتتا 5 جىلعا نەسيە الۋدى شەكتەۋ ەسكەرىلگەن. ەكىنشىدەن، ازاماتتار 7 جىلدان كەيىن عانا بانكروتتىققا قايتا جۇگىنە الادى. ۇشىنشىدەن، بانكروتتىقتان كەيىن 3 جىل ىشىندە بانكروتتىڭ قارجىلىق جاعدايىنا مونيتورينگ جۇرگىزىلەدى. سول سەبەپتەن، ازامات ءوزىن بانكروت دەپ جاريالاۋدان بۇرىن ىقتيمال سالدارى مەن شەكتەۋلەر تۋرالى ويلانۋ قاجەت»، - دەدى ە. جاماۋبايەۆ.