ەلوردادا 3 ادامدى قۇتقارعان ءورت سوندىرۋشىگە كومەك جينالىپ جاتىر

بۇل تۋرالى قۇتقارۋشىنىڭ جۇبايى انەل زابيكۋلينا ءوزىنىڭ Instagram جەلىسىندەگى پاراقشاسىندا جازدى، دەپ حابارلايدى قازاقپارات ءتىلشىسى.

«مەن سەنىڭ بۇعان قارسى بولاتىنىڭدى بىلەمىن. ءبىراق مۇنى مەن ەمەس، سەنىڭ دوستارىڭ قولعا الىپ جاتىر. بۇل مەنىڭ جولداسىما ارنالعان كومەك. بارشاڭىزعا العىسىم شەكسىز»، - دەپ جازدى انەل زابيكۋلينا.

قۇتقارۋشىنىڭ جۇبايى جاريالاعان مالىمەتتەرگە ساي، كومەك جيناۋعا ارنالعان شوتتىڭ رەكۆيزيتى:

بانك كارتاسىنىڭ ءنومىرى: 4400430166774841 (انەل زابيكۋلينا)

ۇلى بايلانىس ءنومىرى بويىنشا: 87787055405

سونىمەن قوسا، انەل زابيكۋلينا الەۋمەتتىك جەلىدەگى پاراقشاسىندا جولداسى اسقار زابيكۋلينگە دونور قانى قاجەت ەكەنى تۋرالى حابارلاما جاريالادى. نيەت بىلدىرگەن ازاماتتار استانا قالاسى، كەرەي- جانىبەك حاندار كوشەسى 10 مەكەنجايى بويىنشا ورنالاسقان ترانسفۋزيالوگيا عىلىمي- وندىرىستىك ورتالىعىنا بارىپ، قان تاپسىرا الادى.

ايتا كەتەيىك، كەشە ەلوردادا كوپقاباتتى ۇيدە ءورت بولىپ، 3 ادام، ونىڭ ىشىندە 1 بالا اۋرۋحاناعا تۇسكەن ەدى. ءورت كوپقاباتتى ءۇيدىڭ 11-قاباتىندا تۇتانعان. ءورت ءسوندىرۋشى اسقار زابيكۋلين پاتەرگە تەرەزە ارقىلى كىرۋ ءۇشىن قۇتقارۋ ارقانىمەن 12-قاباتتان 11-قاباتقا تۇسكەن. ىشكە ەنۋ ءۇشىن قورشاۋدى الىپ تاستاپ، ۇستىندەگى كامۋفلياج كيىمىمەن جانىپ جاتقان پاتەرگە كىرىپ، 80 جاستاعى اجەي مەن 22 جاستاعى نەمەرەسىن وتتان شىعارعان. سونىمەن بىرگە، ءورت ءسوندىرۋشى قويۋ تۇتىننەن شىعا الماي، بالكونعا جاسىرىنعان 10 جاسار بالانى قۇتقارىپ ۇلگەرگەن.

اسقار زابيكۋلين اسقان جانكەشتىلىكپەن ءتىلسىز جاۋدان بىرنەشە ادامدى قۇتقارىپ قالدى. الادايدا ءوزى اۋىر جاراقات الىپ، قازىر جانساقتاۋ بولىمىندە جاتىر. اكىمدىك دەرەگىنشە، ءورت ءسوندىرۋشىنىڭ 80 پايىز دەنەسىن كۇيىك شالعان.

بۇگىن پرەزيدەنت ءورت سوندىرۋشىلەردى ماراپاتتاۋ تۋرالى جارلىققا قول قويدى.

وسى ۋاقىتتا زارداپ شەككەن ءورت سوندىرۋشىلەرگە قاتىستى قىزمەتتىك تەرگەۋ ءجۇرىپ جاتىر.