عالىمدار 3 مىڭ جىلدان كەيىن ادامنىڭ قانداي بولاتىنىن بولجادى
استانا. قازاقپارات - Toll Free Forwarding Company عالىمدارى 3000 جىلدان كەيىن ادامنىڭ سىرتقى كەلبەتى ءبىزدىڭ زامانداستارىمىزدان مۇلدەم وزگەشە بولۋى مۇمكىن دەپ بولجاپ وتىر.
بۇل تۋرالى Daily Mail جازدى.
زاماناۋي تەحنولوگيالاردىڭ ادام اناتومياسى مەن فيزيولوگياسىنا اسەرى سالاسىنداعى انىقتامالار مەن ساراپشىلاردىڭ پىكىرلەرى نەگىزىندە زەرتتەۋشىلەر بولاشاق ادامنىڭ مودەلىن جاسادى. ولار الىنعان 3D مودەلىنە «ميندي» دەپ ات قويدى.
زەرتتەۋشىلەردىڭ پىكىرىنشە، گادجەتتەرگە تاۋەلدىلىكتىڭ ارتۋىنا بايلانىستى بولاشاق ادام اعزاسى ءبىرشاما وزگەرىستەرگە ۇشىرايدى، مىسالى، گادجەتتى ۇنەمى ۇستاۋ قاجەتتىلىگىنەن بەلى بۇگىلىپ، مويىن قالىڭداپ، ساۋساقتار بۇرالىپ قالادى.
كوزدى ەكرانداردىڭ جارقىراعان جارىعىنان قورعاۋ ءۇشىن قازىر كەيبىر جانۋارلاردا عانا كەزدەسەتىن ءۇشىنشى قاباق پايدا بولادى.
كومپيۋتەر نەمەسە پلانشەت ەكراندارىنا ۇنەمى ەڭكەيىپ قاراۋ قاجەتتىلىگىنە بايلانىستى مويىن بۇلشىقەتتەرى ۇلكەيەدى. باس سۇيەكتەرى قالىڭداپ، ال مي كىشىرەيەدى.
ميندي - جاقسى جۇمىس جاعدايلارىنىڭ ماڭىزدىلىعىن دالەلدەۋ ءۇشىن 2019-جىلى جاسالعان ەممادان كەيىنگى ۇرپاق.
ەممانى زەرتتەۋشىلەر 3000 نان استام قىزمەتكەردەن دەنساۋلىق ماسەلەلەرى تۋرالى سۇحبات العاننان كەيىن جاساعان.
ول كۇندە كومپيۋتەر ەكرانىنا ۇزاق قاراۋدان كوزدەرى قىزارىپ، ۇستەلىنىڭ ۇستىندە ساعاتتاپ وتىرادى. جاساندى جارىقتا جىلدار بويى جۇمىس ىستەگەندىكتەن تەرى سارعايىپ كەتەدى.
