الماتىدا 3 مىڭنان استام ادامدى كەنە شاقتى
«ەپيدەميالىق ماۋسىمنىڭ باسىنان باستاپ، 13- قازانعا دەيىن الماتىنىڭ مەديتسينالىق ۇيىمدارىنا كەنە شاققان 3068 ادام جۇگىندى. ونىڭ ىشىندە بالالار سانى - 1513. 2021-جىلدىڭ سايكەس كەزەڭىمەن سالىستىرعاندا تۇرعىنداردىڭ كەنە شاعۋى %23,5 - عا ارتقان (2021-جىلى - 2344 جاعداي/ بالالار سانى-1260). كەنەنىڭ شاعۋىنان زارداپ شەككەن 3066 ادامعا سەروپروفيلاكتيكا جۇرگىزىلدى (%99,9)»، - دەلىنەدى ۆەدومستۆو حابارلاماسىندا.
بيىلعى جىلدىڭ 9 ايىندا 100 مىڭ تۇرعىنعا شاققانداعى 0,33 كورسەتكىشپەن كەنە ەنتسەفاليتىنىڭ زەرتحانالىق راستالعان 7 جاعدايى تىركەلدى. 2021-جىلدىڭ سايكەس كەزەڭىندە كەنە ەنتسەفاليتى تىركەلگەن جوق. سونداي-اق، مىڭ تۇرعىنعا شاققاندا 0,42 اۋرۋشاڭدىق كورسەتكىشىمەن لايم اۋرۋىنىڭ (كەنە بوررەليوزىنىڭ) 9 جاعدايى تىركەلدى. بۇل كورسەتكىش 2021-جىلدىڭ سايكەس كەزەڭىمەن سالىستىرعاندا 2,8 ەسە جوعارى (3 جاعداي، كورسەتكىش-0,15) بولدى.
«كەنە ەنتسەفاليتى جانە لايم اۋرۋىمەن (كەنە بوررەليوزىمەن) اۋىرعاندار مەديتسينالىق كومەك الۋ ءۇشىن تراۆماتولوگيالىق پۋنكتتەرگە ۋاقتىلى جۇگىنبەگەن، تيىسىنشە كەنەگە قارسى يممۋنوگلوبۋلين الماعان، سونداي-اق، پروفيلاكتيكالىق ماقساتتا بۇرىن كەنە ەنتسەفاليتىنە قارسى ەكپە الماعان. دياگنوز قويىلعان سوڭ بارلىق ناۋقاستار قالاداعى ستاتسيونارلاردا ەم الدى، ناتيجەسىندە ساۋىعىپ كەتتى»، - دەپ حابارلادى ۆەدومستۆودا.
قالا اۋماعىندا كەنە ارقىلى تاسىمالداناتىن اۋرۋلاردىڭ سپەتسيفيكالىق ەمەس پروفيلاكتيكاسى ماقساتىندا (2424,54 گ ا الاڭدا) اكاريتسيدتىك وڭدەۋ جۇرگىزىلدى. ساياباق جانە ورماندى ايماقتار، ادامداردىڭ دەمالاتىن، جاپپاي جينالاتىن ورىندارى وڭدەلدى.
الماتى قالاسىنىڭ سانيتاريالىق-ەپيدەميولوگيالىق باقىلاۋ دەپارتامەنتى كەنە ەنتسەفاليتىنىڭ الدىن الۋدىڭ نەگىزگى شاراسى ۆاكسينالانۋ ەكەنىن ەسكە سالدى.
ۆاكسينالانۋ كۋرسى 1-7 اي ارالىعىندا ەكى ەكپە الۋدان تۇرادى. كەنە ەنتسەفاليتىنە قارسى ەكپەنى جىل بويى الۋعا دا بولادى، دەگەنمەن، ەكىنشى ەكپەدەن كەيىنگى كەلەسى ەكپەنى 2 اپتا وتكەن سوڭ العان دۇرىس. ەڭ قولايلى كەزەڭ - ءبىرىنشى جانە ەكىنشى ۆاكتسينالانۋ اراسىنداعى ينتەرۆال، ياعني، 5-7 اي (ءبىرىنشىسى كۇزدە، ەكىنشىسى كوكتەمدە) بولىپ تابىلادى. ۆاكسينالانۋدى كۇزدە باستاۋ كەرەك، سەبەبى، ەپيدەميالىق ماۋسىمنىڭ باسىندا ادام اعزاسى يممۋندىق قورعانىستى دامىتادى جانە قاۋىپتى ينفەكتسياعا قارسى تۇرا الادى.
تۇراقتى يممۋنيتەت ءۇشىن ءبىر جىلدان سوڭ ءۇشىنشى ەكپەنى الۋ كەرەك. كەيىن يممۋنيتەتتى ساقتاۋ ءۇشىن ءۇش جىل سايىن ريەۆاكتسيناتسيالاۋ جۇرگىزۋ قاجەت. قالادا ەگۋدى تۇرعىلىقتى جەرى بويىنشا (نەمەسە تىركەلگەن جەرى بويىنشا) اۋماقتىق ەمحانالاردا دارىگەردىڭ كەڭەسىنەن كەيىن تەگىن الۋعا بولادى.
«ۆاكتسينا العان ادامدار اۋىرعان جاعدايدا ولاردا اۋرۋ جەڭىل تۇردە وتەدى جانە سالدارى از بولادى. ۋاقتىلى ۆاكتسينالانۋ ءسىزدى جانە جاقىندارىڭىزدى كەنە ەنتسەفاليتى اۋرۋىنان قورعايدى»، - دەلىنگەن كوميتەت حابارلاماسىندا.
