ەلوردا پوليتسياسىنا كۇن سايىن ازاماتتاردان 3 مىڭعا جۋىق ءوتىنىش تۇسەدى
بۇل تۋرالى نۇر-سۇلتان قالالىق پوليتسيا دەپارتامەنتى جەدەل باسقارۋ ورتالىعىنىڭ باستىعى، پوليتسيا پودپولكوۆنيگى قايرات راۋشانوۆ ءمالىم ەتتى، دەپ حابارلايدى قازاقپارات.
«پوليتسيانىڭ «102» جەدەل شاقىرۋ ارناسىنا كۇن سايىن ازاماتتاردان شامامەن 2-3 مىڭ ءوتىنىش كەلىپ تۇسەدى. جىل باسىنان بەرى 166 مىڭعا جۋىق قوڭىراۋ شالىندى. بۇل وتكەن جىلدىڭ ءدال وسىنداي كەزەڭىمەن سالىستىرعاندا 15 پايىزعا كوپ. قىلمىس فاكتىلەرى بويىنشا 11 مىڭنان استام، قۇقىق بۇزۋشىلىقتار مەن وقيعالار بويىنشا 97 مىڭنان استام جانە وزگە سيپاتتاعى 57-دەن استام حابارلاما الدىق»، - دەدى قايرات راۋشانوۆ ب ا ق وكىلدەرىنە ارنالعان بريفينگ بارىسىندا.
وسى ورايدا ورتالىق باستىعى بەينەباقىلاۋ كامەرالارى قوعامدىق ءتارتىپتى ساقتاۋدا، قىلمىستار مەن قۇقىق بۇزۋشىلىقتاردى انىقتاۋدا پايدالانىلاتىن تەحنيكالىق قۇرالداردىڭ اجىراماس بولىگى ەكەندىگىنە نازار اۋداردى.
«سوڭعى جىلدارى ىشكى ىستەر ورگاندارى جۇيەسىن كەزەڭ- كەزەڭىمەن رەفورمالاۋ جوباسى بەلسەندى ىسكە اسىرىلىپ جاتىر. رەفورمانىڭ باستى مىندەتى مەن نەگىزگى تالابى - حالىققا قىزمەت كورسەتۋدىڭ سەرۆيستىك مودەلى جانە پوليتسيا قولجەتىمدىگى»، - دەدى ول.
