پەتروپاۆلدا اجەسى 3 جاسار نەمەرەسىن اۆتوبۋستا قالدىرىپ كەتكەن

سولتۇستىك قازاقستان وبلىسى پوليتسيا دەپارتامەنتى باسپا ءسوز قىزمەتىنىڭ مالىمەتىنشە، پەتروپاۆلداعى ءۋاليحانوۆ كوشەسىندەگى پوليتسيانىڭ ستاتسيونارلىق پۋنكتىنە ساعات 12.00 شاماسىندا 3 جاسار ءسابيدى قوعامدىق اۆتوبۋستىڭ جۇرگىزۋشىسى الىپ كەلگەن.

ەر ادامنىڭ ايتۋىنشا، ول بالانى باعىتىنىڭ سوڭىندا سالوننان تاپقان. تابىلعان قىز تۋرالى اقپاراتتى پوليتسيانىڭ ۋچاسكەلىك ينسپەكتورى جانبوتا قايىركەنوۆ پەتروپاۆل قالاسى پوليتسيا باسقارماسى جەدەل باسقارۋ ورتالىعىنا بەردى.

«قىز مەنىڭ قولىما كەلىپ، جىلاۋىن توقتاتتى. ءبىز وعان تاتتىلەر ساتىپ اكەلدىك. ءسابي اناسىنىڭ ەسىمىنەن باسقا، ەشتەڭە ايتا المادى»، - دەيدى ۋچاسكەلىك ينسپەكتور.

ال بالانىڭ جوعالعانى تۋرالى «102» ارناسىنا ەشكىم ءوتىنىش بىلدىرگەن جوق. جەدەل باسقارۋ ورتالىعىنىڭ قىزمەتكەرلەرى بارلىق پوليتسيا بولىمشەلەرىن، قالالىق پوليتسيا باسقارماسىنىڭ جەكە قۇرامىن باعدارلاپ، قىزدىڭ اتا-اناسىن ىزدەۋگە كىرىستى. بۇل ۋاقىتتا پەتروپاۆل تۇرعىنى ءسابيىنىڭ جوعالعانىن بايقاپ، ىزدەۋگە كىرىسكەن ەدى. قاتتى ۋايىمداعان ايەل بەرەكە اۋدانىنداعى جاقىن ماڭداعى پوليتسيا بولىمشەسىنە باردى. ستاتسيونارلىق پۋنكتتە وعان بالانىڭ قالانىڭ ەكىنشى شەتىندەگى مودۋلدە ەكەنىن ايتتى. فوتوسۋرەتتەردەن ايەل قىزىن تانىدى.

«بۇل قورقىنىشتى ءتۇس سياقتى بولدى. نە ىستەرىمدى بىلمەي قالدىم. باسىما بىردەن جامان ويلار كەلدى. پوليتسيا قىزمەتكەرى ماعان قىزىمنىڭ ارىپتەستەرىمەن بىرگە ەكەنىن جانە ءبارى جاقسى ەكەنىن ايتقان كەزدە قۋانعانىمنان جىلاپ جىبەردىم. ولارعا العىسىم شەكسىز»، - دەيدى قىزدىڭ اناسى.

كەيىن بەلگىلى بولعانداي، ءسابي اجەسىمەن بىرگە اۆتوبۋسقا مىنگەن. جولدا ۇيىقتاپ قالعان. ال زەينەتكەر جولدا ءوزىن ناشار سەزىنىپ، كولىكتەن ءتۇسىپ قالعان. ول، ءتىپتى، اۆتوبۋستان قالاي شىعىپ، ۇيگە قالاي جەتكەنىن دە بىلمەيدى.