قازاقستاندا ازاماتتاردىڭ بانكروتتىلىعى ءراسىمىنىڭ 3 ءتۇرى ەنگىزىلمەك
«مەملەكەت باسشىسىنىڭ وسى جىلدىڭ 5 - قاڭتارىنداعى تاپسىرماسىن ورىنداۋ ءۇشىن مينيسترلىكپەن زاڭدى تۇلعالاردىڭ بانكروتتىعى ينستيتۋتىن ەنگىزۋ بويىنشا جۇمىس جانداندىرىلدى. حالىقارالىق تاجىريبەنى ەسكەرە وتىرىپ، قارىزدىڭ سوماسى مەن ۇزاقتىعىنا بايلانىستى ءراسىمنىڭ 3 ءتۇرىن ەنگىزۋ ۇسىنىلادى»، - دەدى ول ورتالىق كومۋنيكاتسيالار قىزمەتىندەگى بريفينگ بارىسىندا.
ونىڭ اتاپ وتۋىنشە، بىرىنشىدەن، سوتتان تىس بانكروتتىق ءراسىمىن ادام 12 اي ىشىندە قارىزىن وتەي الماسا قولدانۋعا قۇقىلى. بۇل رەتتە قارىز سوماسى 300 مىڭ تەڭگەدەن اسپاۋى جانە ونىڭ قارىزدى وتەيتىن مۇلكى بولماۋى كەرەك. سونداي- اق 6 اي ىشىندە 5 ميلليون تەڭگەگە جۋىق دەيىنگى قارىزى وتەلمەگەن ازاماتتار سوتقا جۇگىنبەي- اق ءوزىن بانكروت دەپ جاريالاي الادى. مۇنى سوتتان تىس تارتىپپەن بانكتەر مەن ميكروقارجى ۇيىمداردا، كوللەكتورلار الدىندا 5 جىلدان استام بەرەشەگى بار تۇلعالار دا قولدانا الادى.
ەكىنشىدەن، تولەم قابىلەتتىلىگىن قالپىنا كەلتىرۋ ءراسىمىن تۇراقتى كىرىسى بار نەمەسە جوسپار نەگىزىندە (5 جىلعا دەيىن) قارىزدى وتەۋدىڭ باسقا مۇمكىندىكتەرى بار تۇلعالار قولدانۋعا قۇقىلى. قالپىنا كەلتىرۋ جوسپارىن قارجىلىق باسقارۋشى ازىرلەيدى جانە سوتتا بەكىتىلەدى.
ۇشىنشىدەن، سوت بانكروتتىعى ءراسىمى 5 ميلليون تەڭگەدەن اساتىن بەرەشەك بويىنشا قولدانىلادى. بۇل ءراسىم بارىسىندا بورىشكەردىڭ مۇلىگى ساتىلۋعا جاتادى. تۇسكەن قاراجات بەلگىلەنگەن تارتىپپەن كرەديتورلار الدىنداعى قارىزداردى وتەۋگە جۇمسالادى. ەگەر جالعىز تۇرعىن ءۇي كەپىل زاتى بولسا، وندا كرەديتور ونى سوت بانكروتتىعى كەزىندە الۋعا قۇقىلى. ەگەر جالعىز تۇرعىن ءۇي كەپىل زاتى بولىپ تابىلماسا، وندا كرەديتورلار وعان تالاپ قويا المايدى. قالعان وتەلمەگەن سوما بورىشكەردىڭ ارام پيعىل بەلگىلەرى بولماسا ەسەپتەن شىعارۋعا جاتادى. ءبىراق، اليمەنت جانە وزگە ادامنىڭ ومىرىنە جانە دەنساۋلىعىنا كەلتىرىلگەن زالال بويىنشا قارىزدار ەسەپتەن شىعارىلۋعا جاتپايدى.
اۆتور: مارلان جيەمباي
