شىعىس قازاقستاندا قاسكوي 3 بالانىڭ اناسىن توناپ، ءولتىرىپ كەتتى
ش ق و پوليتسيا دەپارتامەنتى باسپا ءسوز قىزمەتىنىڭ مالىمەتىنە سۇيەنسەك، 26-تامىزدا تاڭەرتەڭ ۇيىنەن جۇمىسقا كەتكەن قالالىق اكىمدىك قىزمەتكەرى ءىز-ءتۇسسىز جوعالعان. ۇيالى تەلەفونى ءسوندىرۋلى تۇرعان ايەلدى ۇيىندە 8-11 جاس ارالىعىنداعى ءۇش بالاسى توسىپ جاتتى. كەشكە قاراي ورمان ىشىندە جۇرگىزىلگەن ىزدەستىرۋ شارالارى بارىسىندا ونىڭ ءمايىتى تابىلدى.
زورلىقپەن ولتىرىلگەن ايەل ادامنىڭ بىرنەشە جەرىندە پىشاق جاراقاتتارى بار. وقيعا ورنىنا وسكەمەننەن پروكۋراتۋرا باسشىلىعى مەن كريميناليستەر دەرەۋ كەلىپ جەتتى. بىرنەشە كۇننەن كەيىن جەدەل ۋاكىلدەر كۇدىكتىنى ۇستادى. بۇرىن بىرنەشە رەت سوتتى بولعان 34 جاستاعى ەر ادام ءوز كىناسىن مويىنداعان. جاۋاپ الۋ كەزىندە ول قىلمىسقا مارقۇمنىڭ كۇمىس بۇيىمدارى مەن سومكەسىن تارتىپ الۋ ءۇشىن بارعانىن ايتتى.
«قازىرگى ۋاقىتتا كۇدىكتى قاماۋعا الىندى. وعان قاتىستى ق ر ق ك-نىڭ 99 جانە 192-باپتارى بويىنشا سوتقا دەيىنگى تەرگەۋ امالدارى جۇرگىزىلۋدە. وسى باپتار بويىنشا ەر ادام 20 جىلعا نەمەسە ءومىر بويىنا باس بوستاندىعىنان ايىرىلۋى مۇمكىن»، - دەدى وبلىستىق پ د باستىعىنىڭ ورىنباسارى تالعات شاياحمەتوۆ.
اناسىنان ايىرىلعان بالالار جاقىن تۋىستارىنا قامقورلىققا بەرىلدى. جەرگىلىكتى اتقارۋشى ورگان وكىلدەرى ولارعا قاجەتتى كومەك كورسەتۋدە.
اۆتور: تالعاتجان مۇحامەتبەك ۇلى
