اسحات ايماعامبەتوۆتىڭ جاس تۇلەكتەرگە 3 كەڭەسى
«مىنە، وقۋ جىلى ءوز مارەسىنە جەتتى. بۇل وقۋ جىلى بۇكىل الەمدەگى وقۋشىلار مەن ستۋدەنتتەر ءۇشىن وڭاي بولعان جوق. الەمدىك ءبىلىم ءبىرۋ جۇيەسى پاندەميا سىندى ۇلكەن سىناقتان ءوتتى. ءبىز مۇعالىمدەرمەن بىرلەسە وتىرىپ ءبىلىم بەرۋ جۇيەسىنە جاڭا دەم بەرىپ، ولارعا بارىنشا قاجەتتى جاعداي جاساۋعا تىرىستىق. سىزدەر وقۋلارىڭىزدى اياقتاپ جاتىرسىزدار. كەيبىر تۇلەكتەر جوعارى وقۋ ورىندارىنا نەمەسە كوللەدجدەرگە تۇسسە، ەندى بىرەۋلەرى جۇمىس ىستەيدى. قالاي بولسا دا، الداعى ۋاقىتتا سىزدەردى جاڭا مۇمكىندىكتەر مەن جاڭا ءومىر بەلەستەرى كۇتىپ تۇر. مەكتەپ ءبىتىرىپ جاتقان كەزىم ءالى ەسىمدە: ۇلكەن ومىرگە قادام باسار الدىنداعى قورقىنىش، ۋايىم، كۇدىك، جوسپارلار مەن بولاشاققا دەگەن ءۇمىت. ول كەزدە ءىس جۇزىندە ءبارى باسقاشا ەكەنىن تۇسىنبەگەن ەكەنمىن. ءتىپتى، مەن ويلاعاننان دا وڭاي ەكەن دەپ ايتۋعا بولادى. وسىعان وراي ءوز تاجىريبەممەن بولىسكەندى ءجون كوردىم»، - دەپ جازدى مينيستر Facebook پاراقشاسىندا.
اسحات ايماعامبەتوۆ جاس تۇلەكتەرگە ەڭ الدىمەن ەشقاشان قيىندىقتارعا مويىماۋعا، كوزدەگەن ماقساتىڭا جەتۋ جولىندا الدەبىرەۋدىڭ ايتقانىنا ەرمەي، تۋرا جولدان تايماۋعا كەڭەس بەرەدى. «ەكىنشىدەن، قاتەلەسۋدەن قورىقپاۋ كەرەك. قاتەلىك جاسالسا، ءومىر سونىمەن اياقتالمايدى. بارلىق ادام قاتەلەسەدى. ەڭ باستىسى - ءوز قاتەلىگىمىزدى ۋاقىتىلى ءتۇسىنىپ، تۇزەتۋگە تىرىسۋىمىز الدەقايدا ماڭىزدى. بارىنشا كۇش-جىگەرىمىزدى سالىپ، العان بەتتەن قايتپاعانىمىز ابزال. مىنە، بۇل بولاشاقتا تابىسقا قول جەتكىزەتىن ادامعا ءتان قاسيەت»، - دەدى ول.
سونىمەن قاتار مينيستر باسقالارعا قاراعاندا ەرەكشە بولۋدان ۇيالماۋعا شاقىرادى.
«ەڭ باستىسى وزىڭىزگە ادال بولىڭىز. باسقا ادامدارمەن ارالاسىپ، دوس بولىڭىزدار. اتا-انالارىڭا قامقور بولىپ، باۋىرلارىڭىزبەن بايلانىستى ەشقاشان جوعالتپاڭىزدار. كەيىن، مۇمكىن 30 جاسقا كەلگەندە، اتا- انانىڭ بەرگەن اقىل-كەڭەستەرى ورىندى ەكەنىن تۇسىنە باستايسىزدار. بويلارىڭىزدا جاڭا ادەتتەر قالىپتاستىرىڭدار! دەنساۋلىقتارىڭدى نىعايتىڭدار! بۇكىل الەم قارسى بولسا دا، قايسارلىق تانىتىپ، العان باعىتتان قايتپاعان ءجون»، - دەدى اسحات ايماعامبەتوۆ.
