18:31, 17 - ناۋرىز 2021 | GMT +6
قازاقستاندا جالپى ىشكى ءونىم 3 پايىز جوعارى بولادى دەپ بولجانۋدا
نۇر- سۇلتان. قازاقپارات - قازاقستاندا جالپى ىشكى ءونىم ءوسۋ بولجامى ارتۋى مۇمكىن. بۇل تۋرالى ۇلتتىق ەكونوميكا ءمينيسترى اسەت ەرعاليەۆ ايتىپ بەردى، دەپ حابارلايدى قازاقپارات ءتىلشىسى.
«قازىر ءبىز ۇكىمەتتە بيۋدجەتتى ناقتىلاۋ اياسىندا الداعى ءۇش جىلعا ارنالعان بولجامداردىڭ جاڭا كەزەڭىن قالىپتاستىرۋعا كىرىستىك. اتاپ ايتقاندا، 2021 -جىلعا ارنالعان بولجامىمىزدى ناقتىلايمىز. بالكىم، كىشىگىرىم ارتتىراتىن شىعارمىز. بۇل سىرتقى- ەكونوميكالىق جاعدايدىڭ وزگەرۋىنە بايلانىستى. سوڭعى ۋاقىتتا مۇناي باعاسىنىڭ قالاي وزگەرگەنىن جانە ەكونوميكامىزدىڭ بەلگىلى ءبىر سەكتورلاردا قارقىن الىپ كەلە جاتقانىن كورىپ وتىرمىز»، - دەدى سپيكەر ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا.
اسەت ەرعاليەۆتىڭ ايتۋىنشا، بيىل جالپى ىشكى ءونىم ءوسىمىنىڭ بولجامى % 3,1- عا دەيىن ارتۋى مۇمكىن. وتكەن جىلى جالپى ىشكى ءونىم ءوسىمى 2021 –جىلى % 2,8 دەڭگەيىندە بولادى دەپ بولجانعان ەدى.
اۆتور: ايجان سەرىكجان قىزى