اقمولا وبلىسىندا جول اپاتىنان 3 ادام مەرت بولدى

كوكشەتاۋ. قازاقپارات - اقمولا وبلىسىندا جانتۇرشىگەرلىك جول اپاتىنان 3 ادام كوز جۇمدى، تاعى 4 ادام ءتۇرلى دەنە جاراقتىمەن اۋرۋحاناعا جاتقىزىلدى، دەپ حابارلايدى قازاقپارات ءتىلشىسى وبلىستىق پ د باسپا ءسوز قىزمەتىنە سىلتەمە جاساپ.

ۆەدومستۆونىڭ مالىمەتىنشە، جول- كولىك وقيعاسى اقپاننىڭ 18 ىندە «كوكشەتاۋ- اتباسار» تاسجولىنىڭ ايدارلى اۋىلى ماڭىندا بولعان.

«انىقتالعانداي «كوكشەتاۋ- اتباسار» تاسجولىنىڭ 29 شاقىرىمىندا «تويوتا كامري» كولىگىنىڭ 43 جاستاعى جۇرگىزۋشىسى رۋلگە يە بولا الماي، قارسى باعىتتا ءجۇرىپ كەلە جاتقان «ۆاز-2115» كولىگىمەن بەتپە- بەت سوقتىعىسقان. «ۆاز-2115» كولىكتىڭ رۋلىندە 46 جاستاعى ەر ادام باسقارعان. جول اپاتىنان 3 ادام كوز جۇمىپ، 4 ادام ءتۇرلى دەنە جاراقتىمەن اۋرۋحاناعا جاتقىزىلدى»، - دەدى ۆەدومستۆودان.

قازىرگى كەزدە، وسى وقيعاعا بايلانىستى قىلمىستىق كودەكسىنىڭ 345-بابى 4-بولىگى بويىنشا سوتقا دەيىنگى ءىس قوزعالىپ، تەرگەۋ امالدارى جۇرگىزىلۋدە. ايتا كەتەيىك، «كوكشەتاۋ - اتباسار» تاسجولىندا بۇعان دەيىن دە تاعى ءبىر كولىك اپاتى بولعان ەدى.