قازاقپارات كۇنتىزبەسى: 3- اقپان
ەستە قالار وقيعالار
1925-جىلى «جاس قايرات» اپتالىق گازەتىنىڭ العاشقى سانى جارىق كوردى. باستاپقىدا ورىنبوردا، كەيىن قىزىلوردادا شىققان باسىلىمنىڭ تارالىمى 2000 دانانى قۇراعان. گازەتتىڭ «سوڭعى جەتىنىڭ ىشىندە» اتتى ايدارىندا شەت ەلدەردەگى، سوۆەت وداعىنداعى جاڭالىقتارمەن تانىستىرسا، «قازاقستان جاستارى» بولىمىندە جەرگىلىكتى ۇيىم ءومىرىن، جەكە جاستاردىڭ تالاپ-تىلەكتەرىن جاريالاپ تۇرعان.
«ءتانى ساۋدىڭ - جانى ساۋ» ايدارىمەن دارىگەرلىك كەڭەستەر، سپورت جونىندەگى ماتەريالدار بەرىپ وتىرعان. قارجى تاپشىلىعىنا بايلانىستى باسىلىم 1926-جىلى قازاننىڭ 30 ىندا 57-سانى جارىق كورگەننەن كەيىن توقتاعان.
1990 -جىلى قازاقستان رەسپۋبليكاسىنىڭ ۇلتتىق وليمپيادا كوميتەتى قۇرىلدى جانە ونى 1992 -جىلى ناۋرىز ايىندا حالىقارالىق وليمپيادا كوميتەتى مويىندادى. شتاب-پاتەرى الماتىدا ورنالاسقان.
حالىقارالىق وليمپيادا كوميتەتىنىڭ، ازيا وليمپيادا كەڭەسىنىڭ جانە وزگە دە حالىقارالىق سپورت ۇيىمدارىنىڭ مۇشەسى. قازاقستانداعى سپورتتى دامىتۋ قىزمەتىمەن اينالىسادى.
2006 -جىلى سەمەي پوليگونىنىڭ العاشقى كارتاسى جارىققا شىقتى. وندا اكىمشىلىك شەكارالار، ەلدى مەكەندەر، وزەندەر مەن جولداردان باسقا پايدالانۋ ءۇشىن قاۋىپتى بارلىق لاستانعان راديواكتيۆتى ۋچاسكەلەر كورسەتىلگەن. اتالعان جوبا ەۋروپاداعى قاۋىپسىزدىك جانە ىنتىماقتاستىق ۇيىمىنىڭ قازاقستانداعى ميسسياسى، نيدەرلاندتىڭ Hivos قورى كومەگىمەن ىسكە استى.
2007 -جىلى كييەۆتەگى تاراس شيەۆچەنكو اتىنداعى ۇلتتىق وپەرا جانە بالەت تەاترىندا ۋكرايناداعى قازاقستان جىلىنىڭ رەسمي اشىلۋ سالتاناتى ءوتتى.
2010 -جىلى قازاقستاننىڭ گەرمانياداعى ەلشىلىگى ۇلتتىق اكادەميالىق كىتاپحاناعا نەمىس تىلىندە جارىق كورگەن 65 كىتاپتى سىيعا تارتتى. كىتاپحاناعا تارتۋ ەتىلگەن كىتاپتاردىڭ اراسىندا پرەزيدەنت نۇرسۇلتان نازاربايەۆتىڭ «ەۋرازيا جۇرەگىندە»، «قازاقستاندىق جول» جانە ت. ب. كىتاپتارى، ابايدىڭ، مۇحتار اۋەزوۆتىڭ، ءابىش كەكىلبايدىڭ، گەرولد بەلگەردىڭ، ت. ب. تاڭدامالى شىعارمالارى بولدى.
2014 -جىلى رەسپۋبليكانىڭ عالىمدار جانە مەتسەناتتارىنىڭ ءبىر توبى «قازاقتار. تاريح جانە مادەنيەت» اتتى بىرەگەي كىتاپتى جارىققا شىعاردى. كىتاپ قازاق، ورىس جانە اعىلشىن تىلدەرىندە باسىلىپ شىققان.
كىتاپتا XIX عاسىرداعى ەۋروپا جانە رەسەي فوتوگرافتارى مەن سۋرەتشىلەرىنىڭ قولىنان شىققانقازاق تۇرمىس-تىرشىلىگى تۋرالى سيرەك كەزدەسەتىن، ءتىپتى بۇرىن بەلگىسىز كونە سۋرەتتەر، شەتەلدىك كارتوگرافتار جاساعان قازاق جەرىنىڭ ەسكى كارتالارى بار.
ەتنوگرافتار نازگۇل بايعاباتوۆا مەن راقىم بەكنازاروۆ ازىرلەگەن ماتىندەردە قازاق ەتنوگرافياسىنىڭ ەرەكشەلىكتەرى تولىعىمەن سيپاتتالعان.
2017 -جىلى قازاقستاندىق شاحماتشى جانسايا ابدىمالىك chess.pw سايتىندا جۇرگىزىلگەن ساۋالنامادا ەۋرازيانىڭ ەڭ ادەمى شاحماتشىسى اتاندى. وعان پولشا، ازەربايجان، ءۇندىستان، يران، وزبەكستان، قىرعىزستان، تاجىكستان جانە قازاقستان وكىلدەرى قاتىستى. 17 جاستاعى حالىقارالىق گروسسمەيستەر جانسايا ابدىمالىك 9136 داۋىسپەن ايقىن جەڭىسكە جەتتى.
2018 -جىلى قازاقستان رەسپۋبليكاسىنىڭ پرەزيدەنتى نۇرسۇلتان نازاربايەۆقا «ەۋرازيا قۇرلىعىندا بەيبىتشىلىك پەن ىنتىماقتاستىق يدەياسىن ناسيحاتتاۋعا قوسقان ۇلەسى ءۇشىن» «حالىقتىڭ سۇيىكتىسى» سىيلىعى تاعايىندالدى.
2019 -جىلى قازاقستاندىق تەننيسشى ەلەنا رىباكينا لونسەستوندا (اۋستراليا) وتكەن ITF سەرياسى تۋرنيرىندە تيتۋلدى جەڭىپ الدى. ونىڭ قارسىلاسى - رەسەيلىك يرينا حروماچيەۆا، فينالدىق ماتچتى اياقتاي المادى.