التاي كولگىنوۆ ەلوردادا شۇعىل شەشۋدى قاجەت ەتەتىن 3 پروبلەمانى اتادى

بۇل تۋرالى نۇر-سۇلتان قالاسىنىڭ اكىمى التاي كولگىنوۆ ايتتى، دەپ حابارلايدى قازاقپارات ءتىلشىسى.

«ءۇشىنشى جىلۋ ەلەكتر ستانساسىن اياقتاۋ سىندى جۇيەلى ماسەلەلەر بار. كەلەر جىلى ونىڭ قۇرىلىسىن اياقتامايتىن بولساق، وندا تاياۋ ۋاقىتتا جىلۋ جەتىسپەۋشىلىگىنە قاتىستى قيىندىقتار تۋىنداۋى مۇمكىن»، - دەدى ول نۇر-سۇلتان قالالىق ءماسليحاتىنىڭ وتىرىسىندا.

سونىمەن قاتار قالا باسشىسى سۋمەن جابدىقتاۋعا قاتىستى دا ماسەلەلەردىڭ بار ەكەندىگىن باسا ايتتى.

«سۋعا قاتىستى ءۇشىنشى سورعى-سۇزگى ستانساسىن سالۋىمىز قاجەت. ايتپەسە، تاياۋ ۋاقىتتا سۋ تاپشىلىعى ورىن الادى. بۇعان قوسا، كارىزدىك تازارتۋ قۇرىلعىسىن دا سالۋعا ءتيىسپىز. ەلوردانىڭ قارقىندى دامۋىنا، حالىق، كولىك سانىنىڭ وسىمىنە قاتىستى وزگە دە پروبلەمالاردى ايتپاعاندا وسى ءۇش ماسەلە جۇيەلى سيپاتقا يە بولىپ وتىر. ارينە، مۇنىڭ بارلىق كولىك، ينجەنەرلىك، الەۋمەتتىك ينفراقۇرىلىمعا جۇكتەمە تۇسىرەدى»، - دەدى التاي كولگىنوۆ.