تۇركياداعى ءزىلزالا: ءۇش كۇنگە جۋىق ءۇيىندىنىڭ استىندا جاتقان 3 جاسار قىز قۇتقارىلدى
يزمير. انادولى- قازاقپارات - يزمير قالاسىندا قيراندىلاردىڭ استىندا جاتقان 3 جاسار ەليف پەرينچەك ارادا 65 ساعات وتكەندە قۇتقارىلدى.
ول - تۇركيانىڭ باتىسىندا بولعان ءزىلزالادان سوڭ قۇتقارۋشىلار امان الىپ شىققان 106-تۇرعىن، دەپ حابارلايدى قازاقپارات انادولى اگەنتتىگىنە سىلتەمە جاساپ.
كىشكەنتاي قىز جاقىن ماڭداعى اۋرۋحانالاردىڭ بىرىنە جەتكىزىلدى. تۇركيا ۇكىمەتى جانىنداعى توتەنشە جاعدايلاردىڭ الدىن الۋ جانە سالدارىن جويۋ باسقارماسىنىڭ (AFAD) باسشىسى مەحمەت گيۋلليۋوگلۋ بالانىڭ قۇتقارىلعانىنا قۋانىشىن ءبىلدىردى. ەليفتىڭ تۋىستارى بۇنى تاڭعاجايىپ وقيعاعا تەڭەپ وتىر. بۇنىڭ الدىندا بۇگىن قۇتقارۋشىلار ءۇيىندىنىڭ استىنان 14 جاسار يديل شيريندى الىپ شىققان بولاتىن. 2-قاراشاداعى جاعداي بويىنشا، تۇركيانىڭ يزمير قالاسىندا ماگنيتۋداسى 6.6 جەر سىلكىنىسىنىڭ سالدارىنان 79 ادام قازا تاپقان. زارداپ شەككەن 963 ادامنىڭ ىشىندە 743 ادام اۋرۋحانادان شىعارىلدى، 219 ادام ەم قابىلداپ جاتىر. سەگىز تۇرعىن ءۇيدىڭ ۇيىندىلەرىندە ىزدەۋ- قۇتقارۋ جۇمىسى جالعاسىپ جاتىر. تۇركيا جاعالاۋىنداعى ءبىرىنشى جەر سىلكىنىسىنەن كەيىن ەگەي تەڭىزىندە جالپى العاندا 1120 ءالسىز سەزىلگەن جەراستى ءدۇمپۋى تىركەلگەن، بۇل رەتتە 43 ىنىڭ ماگنيتۋداسى 4 بالدان استى. تۇركيا پرەزيدەنتى رەجەپ تايىپ ەردوعان ءزىلزالا سالدارىن جويۋ ءۇشىن مەملەكەتتىڭ بۇكىل قاجەتتى قورى شوعىرلاندىرىلاتىنىن مالىمدەدى. سونداي-اق ول باسپاناسىنان ايىرىلعان بارلىق تۇرعىننىڭ جاڭا پاتەر الاتىنىن اتاپ ءوتتى.
اۆتور: زارينا تۋعانبايەۆا
