وزبەكستان كوروناۆيرۋس جۇقتىرعان تۋريستكە 3 مىڭ دوللار تولەمەك
ەل پرەزيدەنتى 19- ماۋسىمدا ءتيىستى قاۋلىعا قول قويدى.
بۇل تۋرالى «وزبەكستان 24» تەلەارناسىنىڭ ارنايى حابارىندا ايتىلدى، دەپ حابارلايدى قازاقپارات.
«سانيتارلىق-ەپيدەميولوگيالىق قاۋىپسىزدىك رەجيمىنىڭ كۇشەيتىلگەن تالاپتارىن قاتاڭ ساقتاي وتىرىپ، تۋريزم سالاسىن دامىتۋدىڭ قوسىمشا شارالارى تۋرالى» دەپ اتالاتىن قاۋلى ارقىلى ەلدە «Uzbekistan. Safe travel guaranteed» (وزبەكستان. قاۋىپسىز ساياحاتتاۋعا كەپىلدىك) جۇيەسى ەنگىزىلەدى.
وسى جۇيەنىڭ اياسىندا قاۋىپسىز تۋريزم قورى قۇرىلۋدا. وعان داعدارىسقا قارسى قوردان 20 ميلليارد سۋم بولىنەدى، سونداي-اق سەرتيفيكاتتاۋ جارنالارىنا تولەنەتىن تولەمدەر ارقىلى قارجى قۇيىلادى.
يننوۆاتسيالىق دەنساۋلىق ساقتاۋ ۇلتتىق پالاتاسىنىڭ ءتوراعاسى راۆشان يزاموۆ «وزبەكستان 24» ارناسىنىڭ تىلشىسىنە بەرگەن سۇحباتىندا جەرگىلىكتى جانە شەتەلدىك تۋريستەر وزبەكستانعا ساياحاتتاۋدىڭ قاۋىپسىز ەكەنىنە سەنىمدى بولۋى كەرەك ەكەنىن تىلگە تيەك ەتتى.
«ەگەر شەتەلدىك تۋريست كوروناۆيرۋستىق ينفەكتسيانى جۇقتىرسا، وعان 3000 دوللار وتەماقى تولەنەدى. بۇل تاجىريبە الەمنىڭ كوپتەگەن ەلدەرىندە كەڭىنەن قولدانىلادى. تۋروپەراتورلار كارانتين كەزەڭىندە شەتەلدىك تۋريستەرگە تەك «Uzbekistan. Safe travel guaranteed» جۇيەسىنىڭ تىزىلىمىنە ەنگىزىلگەن نىسانداردا عانا قىزمەت كورسەتە الادى»، - دەپ حابارلادى «وزبەكستان 24» ءتىلشىسى ارنايى حاباردا.
