كوروناۆيرۋس: ەلوردادا كوز جۇمعان ادام ۇيدە 3 كۇن بويى اۋىرعان

ونىڭ ايتۋىنشا، 1950 -جىلى تۋعان تۇرعىن 11-ساۋىردە جەدەل جاردەم قىزمەتى ارقىلى پروۆيزورلىق اۋرۋحاناعا اۋىر حالدە تۇسكەن.

«جاعدايى اۋىر بولعاندىقتان، ناۋقاس جەدەل تۇردە رەانيماتسياعا جاتقىزىلدى. تۋىستارىنىڭ ايتۋىنشا، مارقۇم ۇيدە 3 كۇن بويى اۋىرعان، دەنە قىزۋى 38 گرادۋسقا دەيىن كوتەرىلگەن. مەديتسينالىق كومەككە جۇگىنبەي، وزدىگىنەن قىزۋدى باساتىن دارىلەر ىشكەن. ەنتىگىپ، تىنىس الۋ قيىنداعان سوڭ ستاتسيونارعا جۇگىنگەن»، - دەدى باسقارما باسشىسى «حابار 24» تەلەارناسىنداعى بريفينگتە. ودان بولەك، ناۋقاس ارتەريالىق گيپەرتەنزيا، قانت ديابەتى، جۇرەك يشەمياسىمەن اۋىرعان.

2011 -جىلى وعان اورتاكارانارلىق شۋنتتاۋ جاسالعان.

«ناۋقاستان كوروناۆيرۋستىق ينفەكسيا تابىلدى، اۋرۋدى دياگنوستيكالاۋ مەن ەمدەۋدىڭ كلينيكالىق حاتتاماسىنا سايكەس ەم-دوم جۇرگىزىلدى. كاسىبي مامانداردىڭ قاتىسۋىمەن كونسيليۋم جۇرگىزىلدى. ءبىراق، قارقىندى تەراپياعا قاراماستان اعزالىق جەتىسپەۋشىلىك بەلگىلەرى كوبەيىپ، 13-ساۋىردە ساعات 23:40 تا ناۋقاس كوز جۇمدى. جۇرگىزىلگەن بارلىق رەانيماتسيالىق شارالار كومەكتەسپەدى. تۋىستارى اراسىنان جاقىن بايلانىستا بولعان ادامدار تەكسەرىلىپ، ءۇي جاعدايىندا كارانتينگە ورنالاستى»، - دەدى س. قيسىقوۆا.

ايتا كەتەيىك، قازىرگى ۋاقىتتا نۇر-سۇلتان قالاسى بويىنشا 264 ادام، الماتى قالاسىندا - 346 ادام، قاراعاندى وبلىسىندا - 79 ادام، اقمولا وبلىسىندا - 73 ادام، اتىراۋ وبلىسىندا - 63 ادام، جامبىل وبلىسىندا - 49 ادام، شىمكەنت قالاسىندا - 39 ادام، شىعىس قازاقستان وبلىسىندا - 8 ادام، الماتى وبلىسىندا - 22 ادام، اقتوبە وبلىسىندا - 11 ادام، سولتۇستىك قازاقستان وبلىسىندا - 26 ادام، پاۆلودار وبلىسىندا - 10 ادام، ماڭعىستاۋ وبلىسىندا - 10 ادام، قىزىلوردا وبلىسىندا - 119 ادام، باتىس قازاقستان وبلىسىندا - 11 ادام، تۇركىستان وبلىسىندا - 47 ادام، قوستاناي وبلىسىندا - 3 ادام، جالپى 1179 ناۋقاس تىركەلدى.

اۆتور: ايجان سەرىكجان قىزى