كوروناۆيرۋسپەن كۇرەس: قىتايلىق دارىگەرلەر قازاقستاننىڭ 3 قالاسىندا تاجىريبە كورسەتەدى
دەلەگاتسيانى ق ر دەنساۋلىق ساقتاۋ ۆيتسە- ءمينيسترى كامالجان نادىروۆ كۇتىپ الدى. «بۇگىن قىتايلىق ارىپتەستەرىمىزدى قارسى الدىق. بۇل كەزدەسۋ ەكى ەل باسشىلارىنىڭ ۋاعدالاستىعى اياسىندا وتۋدە. ءبىز ءۇشىن بۇل كەزدەسۋ ءسوزسىز ماڭىزدى، سەبەبى قىتايدىڭ ەپيدەميولوگيا ماسەلەلەرىندەگى ەمدەۋ تاجىريبەسى مەن زەرتتەۋلەرى ماڭىزدى بولىپ وتىر. قىتايدان 10 دارىگەر ارنايى كەلدى، ولاردىڭ اراسىندا پۋلمونولوگ، ەپيدەميولوگ ماماندار، قوعامدىق دەنساۋلىق ساقتاۋ ساراپشىلارى بار. 15 كۇندىك ءىسساپاردا ولار كوروناۆيرۋس ينفەكسياسىن جۇقتىرعانداردى دياگنوستيكالاۋ، ەمدەۋ جانە قوعامدىق دەنساۋلىق ساقتاۋ ماسەلەلەرىن تالقىلايدى»، - دەدى ۆيتسە- مينيستر تىلشىلەرگە بەرگەن سۇحباتىندا.
باعدارلاما اياسىندا قىتايلىق دارىگەرلەر نۇر- سۇلتان، قاراعاندى، الماتى قالالارىنا بارادى. «بىزدە بۇل سىرقاتتان جازىلىپ، اۋرۋحانادان شىققان تۇرعىندار بار. سونىمەن بىرگە، اۋىر حالدە جاتقان ازاماتتارىمىز دا بار. ءبىرقاتارى وكپەنى جاساندى جەلدەتۋ اپپاراتتارىندا جاتىر. سوندىقتان، ارىپتەستەرىمىزبەن تالقىلايتىن ماسەلە كوپ. بىزدە بۇل اۋرۋدى دياگنوستيكالاۋ مەن ەمدەۋدىڭ كلينيكالىق حاتتاماسى بەكىتىلگەن. بۇل حاتتاما ۇزدىك حالىقارالىق تاجىريبەلەرگە ساي كەلەدى. ارىپتەستەرىمىزدىڭ دە تاجىريبەسىن زەرتتەپ، وزىمىزگە پايدالى دەرەك الارىمىزعا سەنىمدىمىن»، - دەدى ك. نادىروۆ.
سونىمەن بىرگە، قازاقستانداعى ق ح ر ەلشىسى جاڭ شياۋ دارىگەرلەردىڭ تاجىريبەلى، جوعارى بىلىكتى مامان ەكەنىن اتاپ ءوتتى. قازاقستاندا پاندەمياعا قاتىستى كۇردەلى جاعداي ورىن الدى. وكىنىشكە قاراي، ۆيرۋس جۇقتىرعانداردىڭ سانى ارتىپ كەلەدى. قىتايدىڭ شىڭجان- ۇيعىر اۆتونومدى اۋدانىنان كەلگەن دارىگەرلەر دە وسى ىندەتپەن كۇرەسىپ، كوپتەگەن ناۋقاستاردى ەمدەپ جازعان. بۇل اۋرۋدىڭ سوققىسى العاش رەت قىتايعا ءتيدى. بۇگىنگە دەيىن ۆيرۋسپەن كۇرەسۋ بويىنشا ءبىرقاتار تاجىريبە جيناقتادىق. ءالى كۇنگە دەيىن بۇل ۆيرۋس - ءبىز ءۇشىن جاڭا، ول تۋرالى بىلەرىمىز از. ءبىراق، قازاقستاندىق دوستارعا دا ايتارىمىز بار. كوروناۆيرۋسپەن كۇرەس بويىنشا تاجىريبە بولىسۋگە دايىنبىز»، - دەدى ەلشى.
قازاقستانعا ارنايى كەلگەن دارىگەرلەردىڭ ايتۋىنشا، قىتاي كوروناۆيرۋسپەن ءۇش اي كۇرەستى. «ءبىز قازاقستانعا تاس- ءتۇيىن دايىندىقپەن كەلدىك. ءبىزدىڭ ماقساتىمىز - ينفەكسيامەن قالاي كۇرەسكەنىمىزدى كورسەتۋ. بارلىعىمىزدىڭ تاجىريبەمىز بار، شىڭجاندا كوروناۆيرۋسپەن كۇرەسكەنبىز. ءبىزدىڭ ەكىجاقتى ىنتىماقتاستىعىمىز نىعايا تۇسەدى دەپ ويلايمىن»، - دەدى شىڭجاندىق دارىگەر لۋ چجەن.
اۆتور: ايجان سەرىكجان قىزى
