10:59, 27 - ناۋرىز 2020 | GMT +6
كوروناۆيرۋس: جامبىل وبلىسىندا انىقتالعان 3 جاعدايعا قاتىستى مالىمەتتەر جاريالاندى
تاراز. قازاقپارات - جامبىل وبلىسىندا تىركەلگەن كوروناۆيرۋسقا شالدىعۋدىڭ ءۇشىنشى وقيعاسىنا قاتىستى مالىمەتتەر جاريالاندى، دەپ حابارلايدى قازاقپارات coronavirus2020.kz سايتىنا سىلتەمە جاساپ.
27- ناۋرىز كۇنى جامبىل وبلىسىندا كوروناۆيرۋس ينفەكتسياسىن جۇقتىرۋدىڭ 3 جاعدايى تىركەلگەن بولاتىن.
«ناۋقاستانعان قورداي اۋدانىنىڭ 1996-جىلعى تۇرعىنى 24- ناۋرىزدا قىرعىزستان رەسپۋبليكاسىنان كەلگەن. بەلگىلەنگەن الگوريتم بويىنشا بويجەتكەن كارانتيندىك ستاتسيونارعا جاتقىزىلدى. زەرتحانالىق تالداۋ ناتيجەلەرى كوروناۆيرۋستىڭ وڭ ناتيجەسىن كورسەتتى»، - دەلىنگەن اقپاراتتا.
پاتسيەنت ينفەكتسيالىق ستاتسيونارعا جاتقىزىلعان. «جاعدايى - قاناعاتتانارلىق. دەنە قىزۋىنىڭ جوعارىلاۋى جانە كوروناۆيرۋستىڭ وزگە بەلگىلەرى بايقالمايدى. كوروناۆيرۋس ينفەكتسياسىنا دياگنوستيكا جانە ونى ەمدەۋ بەكىتىلگەن حاتتاما بويىنشا جۇزەگە اسىرىلۋدا. قارىم-قاتىناستا بولعان تۇلعالار انىقتالىپ، كارانتينگە الىندى. ولاردىڭ اناليزدەرىنە تالداۋ جاسالۋدا»، - دەلىنگەن باسپا ءسوز مالىمەتىندە.