كوروناۆيرۋسقا بايلانىستى جالعان اقپارات تاراتقان 3 تۇركىستاندىق تەرگەلىپ جاتىر

بۇل تۋرالى وڭىرلىك كوممۋنيكاتسيالار قىزمەتىندە وتكەن بريفينگتە وبلىستىق پوليتسيا دەپارتامەنتى باستىعىنىڭ ءبىرىنشى ورىنباسارى ءابدىعاني سەيدۋاليەۆ مالىمدەدى، دەپ حابارلايدى قازاقپارات ءتىلشىسى.

ءابدىعاني سەيدۋاليەۆتىڭ ايتۋىنشا، ماقتاارال مەن شاردارا اۋداندارى جانە كەنتاۋ قالاسىندا وسىنداي 3 دەرەك تىركەلىپ وتىر.

«بۇل تۇرعىندار كوروناۆيرۋسقا بايلانىستى ءجۇرىپ جاتقان وقۋ-جاتتىعۋ جۇمىستارىن ۇيالى تەلەفونعا ءتۇسىرىپ، سول وڭىرلەردە وبا تاراپ جاتىر دەگەن ماعىنادا بەينەماتەريالداردى الەۋمەتتىك جەلىلەرگە سالعان. قازىر تەرگەۋ امالدارى جۇرۋدە. ق ر قىلمىستىق كودەكسىنىڭ 274-بابى «كورىنەۋ جالعان اقپارات تاراتۋ» دەپ اتالادى جانە ونىڭ سانكتسياسىندا 10 جىلعا دەيىن باس بوستاندىعىنان ايىرۋ جازاسى كورسەتىلگەن»، - دەدى ءابدىعاني تويشى ۇلى.

پوليتسەيدىڭ سوزىنشە، اتالعان زاڭ بويىنشا كورىنەۋ جالعان اقپارات تاراتۋشىعا - ءبىر مىڭ ايلىق ەسەپتىك كورسەتكىشكە دەيىنگى مولشەردە ايىپپۇل سالىنۋى مۇمكىن. نە بولماسا سول مولشەردە تۇزەۋ جۇمىستارىنا تارتىلادى، نەمەسە ءبىر جىلعا دەيىنگى مەرزىمگە باس بوستاندىعى شەكتەلەدى، نە ءبىر جىلعا سوتتالۋى ىقتيمال.