قازاقستاندا ەڭبەك داۋلارى 3 ەسەگە ازايدى
«بۇل جۇمىس ۇكىمەت بەكىتكەن الەۋمەتتىك شيەلەنىستەردى بولدىرماۋ جونىندەگى كەشەندى جوسپار اياسىندا جۇرگىزىلۋدە. ەڭبەك تاۋەكەلدەرى شەڭبەرىندە مونيتورينگىلەۋ 170 مىڭ جۇمىسكەرى بار 359 پروبلەمالىق كاسىپورىندى قامتدى. بۇل رەتتە جوعارعى تاۋەكەل ايماعىندا نۇر- سۇلتان قالاسى، ماڭعىستاۋ، اقتوبە جانە اتىراۋ وبلىستارى بار. سوڭعى جىلدارى ەڭبەك داۋلارى 3 ەسەگە تومەندەدى. بيىلعى جىلدىڭ باسىنان بەرى رەسپۋبليكا بويىنشا 9 ەڭبەك قاقتىعىسى ورىن الدى. ولاردىڭ جەتەۋى - ەلىمىزدىڭ باتىس وڭىرلەرىندە شەتەلدىكتەردىڭ قاتىسۋىمەن مۇناي- گاز جانە مۇناي-سەرۆيستىك كاسىپورىنداردا بولدى»، - دەدى ءبىرجان نۇرىمبەتوۆ ۇكىمەت وتىرىسىندا.
مينيستر اتاپ وتكەندەي، نارازىلىقتىڭ باستى سەبەپتەرى - جۇمىسكەرلەردىڭ ەڭبەكاقىسى، جەرگىلىكتى جانە شەتەلدىك جۇمىسكەرلەرگە قاتىستى ەڭبەك پەن تۇرمىستىق جاعدايلاردىڭ تەڭسىزدىگى.
«ەڭبەك جانجالدارىنىڭ الدىن الۋدىڭ ماڭىزدى قۇرالدارىنىڭ ءبىرى - جۇمىس بەرۋشى مەن جۇمىسشىلار اراسىنداعى ءوزارا قارىم-قاتىناستى رەتتەۋگە مۇمكىندىك بەرەتىن ۇجىمدىق شارت جاساسۋ دەپ سانايمىز. بۇگىنگى كۇنى ءىرى جانە ورتا كاسىپورىنداردىڭ 97 پايىزى ۇجىمدىق شارتتارمەن قامتىلۋىنا قاراماستان ەڭبەك جانجالدارىنىڭ پايدا بولۋى - سول قۇجاتتاردىڭ ساپاسىنىڭ تومەندىگىن كورسەتەدى. بۇل تۇرعىدا جۇمىسكەرلەردىڭ بىرلەستىگى، كاسىپوداقتار بەلسەندىلىك تانىتۋى ءتيىس دەپ سانايمىز»، - دەدى ول.
ەسكە سالا كەتسەك، ۇكىمەت باسشىسى جالاقىنى بەرمەۋدىڭ جۇمىس بەرۋشى ءۇشىن ءتيىمسىز بولاتىنداي ەتىپ زاڭناما نورمالارىن كۇشەيتۋدى تاپسىردى.
اۆتور: ايان بەكەن ۇلى
