07:31, 28 - مامىر 2019 | GMT +6
اقتوبەلىك سۋرەتشى ءۇيدىڭ قاسبەتىنە ديماشتىڭ پورترەتىن 3 كۇندە سالدى
اقتوبە. قازاقپارات - ديماش قۇدايبەرگەننىڭ پورترەتى اقتوبە قالاسىنىڭ 150 جىلدىعى مەن ءانشىنىڭ 25 جاسىنا وراي سالىندى، دەپ حابارلايدى قازاقپارات ءتىلشىسى.
اقتوبە قالاسىنداعى 12 ىقشام اۋداندا ديماش قۇدايبەرگەننىڭ پورترەتى بار. بەس قاباتتى تۇرعىن ءۇيدى اكىمدىك تاڭداپ، ءانشىنىڭ سۋرەتىن مەردىگەرلەرگە بەرگەن ەكەن. اتى-ءجونىن ايتۋدان باس تارتقان سۋرەتشى نەبارى ءۇش كۇندە پورترەتتى سالىپ شىقتى.
«اقتوبە قالالىق ساۋلەت جانە قالا قۇرىلىسى ءبولىمىنىڭ ۇسىنىسىمەن ديماشتىڭ پورترەتى سالىندى، وعان دەمەۋشىلەر قولداۋ كورسەتتى. سۋرەتشى اتى- ءجونىن قۇپيا ساقتاۋدى ءجون كورىپ وتىر. بوياۋ سۋىققا، كۇنگە، جاڭبىرعا ءتوزىمدى. ءتىپتى جەتى جىلعا دەيىن ساقتالادى دەپ وتىر. بۇل ءبىزدىڭ العاشقى جوبامىز»، - دەدى مەردىگەر بەرىك اقىلبايەۆ.
ايتا كەتەيىك، ديماش قۇدايبەرگەن 25 جاسقا تولدى. ول ءوز تۋعان كۇنىندە اقتوبەگە كەلىپ، قارتتار ۇيىندەگى تۇرعىندارمەن كەزدەستى.