جەڭىس قاسىمبەك: كومىردىڭ تونناسى 3 مىڭ تەڭگەگە تومەندەيدى
بۇل تۋرالى بۇگىن ۇكىمەتتىڭ سەلەكتورلىق رەجىمدەگى وتىرىسىندا ق ر ينۆەستيتسيالار جانە دامۋ ءمينيسترى جەڭىس قاسىمبەك ايتتى، دەپ حابارلايدى قازاقپارات ءتىلشىسى.
«اكىمدىكتەردىڭ بەرگەن مالىمەتتەرى بويىنشا، بيىل 1- مامىر مەن 23- قاراشا ارالىعىندا كوممۋنالدىق-تۇرمىستىق قاجەتتىلىكتەر ءۇشىن حالىققا كومىر قورىن جيناۋ جۇمىستارى جوسپارلى رەجيمدە ورىندالۋدا. باتىس قازاقستان مەن قوستاناي وبلىستارى قاجەتتى كومىرمەن تولىق قامتاماسىز ەتىلدى. جىلدىق جوسپارعا سايكەس، سەگىز وبلىستى جانە الماتى مەن شىمكەنت قالالارىن كومىر قورىمەن قامتۋ كورسەتكىشى 85 پايىزدان اسادى»، - دەدى ول.
ونىڭ سوزىنە قاراعاندا، جەرگىلىكتى اتقارۋشى ورگانداردىڭ اقپاراتىنا سايكەس حالىققا جەتكىزىلەتىن كومىردىڭ باعاسى ونىڭ ساپاسى مەن سوڭعى تۇتىنۋشىعا دەيىنگى قاشىقتىققا بايلانىستى ورتاشا ەسەپپەن 15 مىڭ تەڭگەنى قۇرايدى.
«كوممۋنالدىق-تۇرمىستىق كومىر تاريفتەرىن جانە باعالارىن تومەندەتۋ ماسەلەسى بويىنشا ءسىزدىڭ تاپسىرماڭىزدى ورىنداۋ ءۇشىن ق ر ينۆەستيتسيالار جانە دامۋ مينيسترلىگى، تاۋ-كەن ءوندىرۋ جانە تاۋ-كەن مەتاللۋرگيا كاسىپورىندارى قاۋىمداستىعى جەرگىلىكتى اتقارۋشى ورگاندار جانە قويمالارداعى كوممۋنالدىق-تۇرمىستىق كومىردى ساتۋشىلار اراسىندا مەموراندۋم جوباسىن ازىرلەدى. سولتۇستىك قازاقستان، شىعىس قازاقستان، قاراعاندى، اقمولا، قوستاناي جانە الماتى وبلىستارىنىڭ جەرگىلىكتى اتقارۋشى ورگاندارى وڭىرلەردە ورنالاسقان قويما يەلەرىمەن مەموراندۋمدار جاساستى. قالعان وڭىرلەر دە وسىنداي مەموراندۋمعا قول قويۋ جۇمىستارىن جۇرگىزۋدە. بۇل جۇمىس ەكى كۇننىڭ ىشىندە تولىعىمەن اياقتالادى دەپ جوسپارلاپ وتىرمىز»، - دەدى جەڭىس قاسىمبەك.
ءمينيستردىڭ ايتۋىنشا، وسى جۇمىستىڭ ناتيجەسىندە كومىر قويمالارى مەن بولشەكتەپ ساتۋ ورىندارىنداعى باعانى تومەندەتۋ جوسپارلانعان.
«باعا ورتاشا ەسەپپەن 15-20- پايىزعا نەمەسە 2500-3000 تەڭگەگە تومەندەيتىن بولادى»، - دەدى جەڭىس قاسىمبەك.