بالالارعا بازارلىق: «مونسترلار دەمالىسى-3» مۋلت فيلمى قازاق تىلىندە سويلەدى
«بولاشاق» ك ق، BI Group, Marwin جانە Sony Pictures دۇكەندەر جەلىسىنىڭ قولداپ ۇيىمداستىرۋىمەن «مونسترلار دەمالىسى-3» انيماتسيالىق فيلمىنىڭ شىم-شىتىرىققا تولى جالعاسى شىقتى جانە كارتينا كەيىپكەرلەرى قازاق تىلىندە سويلەدى.
«الەمدىك دەڭگەيدەگى ستۋديانىڭ ءوز تۋىندىلارىن قازاق تىلىندە تاراتۋعا قۇقىق بەرۋى ءبىز ءۇشىن ماڭىزدى، سەبەبى كورەرمەندى انا تىلىمىزدەگى تۋىندىلارمەن كوبىرەك قۋانتقىمىز كەلەدى. ونىڭ ۇستىنە كينەماتوگرافيا تۋرالى زاڭ جوباسى بۇگىندە پارلامەنت قاراۋىندا، اتالعان زاڭنامادا قازاق تىلىندەگى فيلمدەر كونتەنتىن كوبەيتۋ جانە كينوتەاترلاردىڭ قازاق تىلىندەگى تۋىندىلارعا باسىمدىق بەرۋمەن قاتار كورەرمەندەرگە ىڭعايلى ۋاقىتقا قويۋ ماسەلەلەرى قاراستىرىلعان. وسى تۇرعىدا ءبىز دە ءوز ۇلەسىمىزدى قوسىپ، كىشكەنتاي كورەرمەندەرىمىزدى انا تىلىمىزدەگى تۋىندىلارمەن قۋانتۋدامىز، الدا قازاق تىلىندەگى ساپالى تۋىندىلاردى دايىنداۋدا بىرنەشە ناقتى جوبالارىمىز بار»، - دەدى «بولاشاق» كورپوراتيۆتىك قورىنىڭ اتقارۋشى ديرەكتورى دينارا ءچايجۇنىسوۆا.
«مونسترلار دەمالىسى - 3» انيماتسيالىق فيلمىنىڭ سيۋجەتى بويىنشا دراكۋلا ءوزىنىڭ دوستارىمەن بىرگە ءساندى لاينەرگە ءمىنىپ، كرۋيزگە اتتانادى. كۇتپەگەن جەردەن دراكۋلا جۇمباق تا سۇلۋ كاپيتان ەريكاعا عاشىق بولادى، مۇنى سەزگەن قىزى مەۆيس بۇل ساپاردىڭ سۇمدىققا اينالاتىنىن تۇسىنەدى، ويتكەنى ەريكا بارلىق مونسترلاردىڭ ومىرىنە ءقاۋىپ توندىرەتىن قورقىنىشتى قۇپيانى بىلەتىن ەدى. مونسترلار قۇپيانى اشۋ جولىندا كوپتەگەن شىتىرمان جاعدايلارعا تاپ بولادى جانە انيماتسيالىق ءفيلمنىڭ سوڭى كۇتپەگەن وقيعامەن اياقتالادى.
الدىن الا كورسەتىلىمنىڭ قۇرمەتتى قوناقتارىنىڭ ءبىرى، پارلامەنت ءماجىلىسىنىڭ دەپۋتاتى گەنناديي شيپوۆسكيح فيلمنەن العان اسەرىمەن ءبولىستى.
«ماعان مۋلتفيلم ۇنادى. باستى نازار اۋداراتىنى قازاق تىلىندە شىعۋى جانە ءالى تۇساۋى كەسىلمەگەن الەمدىك دەڭگەيدەگى تۋىندىنى قازاقستاندىق بۇلدىرشىندەردىڭ العاش بولىپ تاماشالاۋى قۋانتارلىق دۇنيە. تاعى ءبىر ايتا كەتەرلىگى - اۋدارما كەزىندە ءتىل تازالىعىنىڭ ساقتالۋى، بىلايشا ايتقاندا «قازاقي» قالپىندا بەرىلگەن»، - دەدى دەپۋتات.
ايتا كەتەيىك، «مونسترلار دەمالىسى - 3» - «بولاشاق» كورپوراتيۆتىك قورى قازاق تىلىنە دۋبلياجداعان 25- فيلم. قازاق ءتىلى دۋبلياجىنىڭ رەجيسسەرى جانە ءماتىننىڭ توسەۋشىسى - ايجان جامشيتوۆا. دۋبلياجعا بارلىعى 30 دان استام اكتەر قاتىسقان.
«مونسترلار دەمالىسى - 3» فيلمىن 12 -شىلدەدەن باستاپ ەلىمىزدىڭ بارلىق كينوتەاترلارىندا قازاق تىلىندە تاماشالاۋعا بولادى.
