قوستانايدا 3 ءتىلدى تۇسىنەتىن قىزمەتتىك ءيت بار
وبلىستىق ءى ءى د- گە قاراستى كينولوگيالىق قىزمەت ورتالىعىنىڭ مىندەتى - قىلمىستىڭ الدىن الۋ، اشۋ. قازىر ورتالىقتاعى 26 ءيت ءىز كەسۋ، ەسىرتكى، جارىلعىش زاتتاردى ىزدەۋ، قوعامدىق قاۋىپسىزدىكتى ساقتاۋ بويىنشا ءتارتىپ ساقشىلارىنا كومەك كورسەتىپ ءجۇر. كينولوگتاردىڭ ايتۋىنشا، ەندى قىزمەتتىك يتتەر باسقاشا ادىسكە ۇيرەتىلەتىن بولادى. بۇگىندە ارنايى وقۋ كۋرسى اشىلعان.
«كەيبىر يتتەرگە جەيدە كيگىزىلىپ، ۆەب- كامەرا تۇيرەلەدى. ولاردى قوعامدىق ورىندارعا الىپ شىعىپ، كۇدىكتىنىڭ ءىزىن كەسۋگە باۋليمىز. سودان سوڭ ولار ءوز بەتىنشە اڭدۋعا كىرىسەدى. ءيتتىڭ باعىتى بەينەكامەرا ارقىلى قاداعالانادى. وسىلايشا، كۇدىكتى تۋرالى كەز كەلگەن مالىمەت تەحنيكتەردىڭ كومپيۋتەرىنەن كورىنىپ تۇرادى»، - دەيدى كينولوگ جاسۇلان بەيسەمبايەۆ.
جاسۇلان بەيسەمبايەۆ كينولوگيالىق ورتالىقتا 11 جىلدان استام ۋاقىت جۇمىس ىستەيدى. ونىڭ ءىز كەسۋشى ءۇش ءيتى بار.
«بۇلاردىڭ ءارقايسىسىنا جەكەلەي مىندەت جۇكتەلگەن. ماسەلەن، نەمىس ءيتى كيكي جارىلعىش زاتتاردى انىقتاسا، شىعىس- ەۋروپالىق وۆچاركا الدو كۇدىكتىلەردى ىزدەپ، قىلمىستىڭ الدىن الۋعا سەپتىگىن تيگىزەدى. قىزمەتتىك يتتەردىڭ ەڭ ەرەكشەسى - بەلگيالىق وۆچاركا گراف. ول ءۇش تىلدە: قازاق، ورىس، نەمىسشە تۇسىنەدى. كەز كەلگەن پارمەندى بۇلجىتپاي ورىندايدى»، - دەيدى كينولوگ.
ايتا كەتەيىك، كينولوگتار 2018 -جىلدىڭ سوڭىندا قىزمەتتىك يتتەر ءۇشىن جاڭا وقۋ كۋرسىن قورىتىندىلايدى.
