الماتىدا 3-قاباتتان قۇلاعان بالانىڭ باسىنا پلاستيكالىق وتا جاسالادى

الماتى. قازاقپارات - «مارت» ساۋدا ويىن- ساۋىق ورتالىعىنىڭ 3- قاباتىنان قۇلاعان 2 جاسار بالانى بۇگىن ۇيىنە قايتارىپ جاتقان الماتى دارىگەرلەرى ءالى دە 4-5 ايلىق ەمدەۋ جوسپارى بار ەكەنىن ايتتى، دەپ حابارلايدى قازاقپارات ءتىلشىسى.

بالالارعا جەدەل مەديتسينالىق كومەك كورسەتۋ ورتالىعى باس دارىگەرىنىڭ ورىنباسارى دىنمۇحاممەد رۋزۋددينوۆ بالانىڭ جاعدايى قاناعاتتانارلىق ەكەنىن ايتتى.

«جارتى جىل بالانىڭ جاعدايىن باقىلايمىز، جاقسى بولسا باسىنا پلاستيكالىق وتا جاسايمىز. باسىنا قان قۇيىلعاندىقتان ءبىرىنشى وتانى باسىنا جاسادىق. باس سۇيەگىنىڭ دەتالدارى ساقتالىپ تۇر. جاعدايى جاقسى بولعاننان كەيىن ەكىنشى وتا جاسايمىز. ەسكە سالا كەتەيىك، بىزگە وتە اۋىر جاعدايدا ءتۇستى. قازىرگى كەزدە جاعدايى قاناعاتتارلىق. بۇعان دەيىن ايتقانىمىزداي، وعان ەكى وتا جاسالدى. ءبىرىنشى، باس سۇيەگىن، ەكىنشى، ورتاڭعى جىلىگىنە جاسادىق. قازىر گيپسپەن ۇيىنە قايتارىلادى. سوسىن، اياعىنداعى گيپسىن شەشەمىز»، - دەدى د. رۋزۋددينوۆ.

 ەسكە سالا كەتەيىك، 20 - قازان كۇنى الماتى دارىگەرلەرى 2 جاسار نۇرعيسانىڭ ورتاڭعى جىلىگىنە وتا جاساعان. وعان دەيىن، 12 - قازان كۇنى اۋرۋحاناعا العاش جەتكىزىلگەندە ءبىرىنشى وتا باسىنا جاسالعان بولاتىن.

ايتا كەتەيىك، 12 - قازان كۇنى 2 جاسار بالا «مارت» ويىن- ساۋىق ساۋدا ورتالىعىنىڭ 3-قاباتىنان قۇلاپ كەتكەن بولاتىن. دارىگەرلەر بالاعا اشىق باسسۇيەك جاراقاتى، ورتاڭعى جىلىك سىنىعى، كەۋدە، ءىش پەردەسىنىڭ سوعىلۋى سەكىلدى دياگنوز قويدى. وقيعا تۇرىكسىب اۋداندىق ءى ءى ب- دە قايعىلى جاعداي رەتىندە تىركەۋگە الىنعان.

اۆتور: الماس مۇقاش ۇلى