ەلدەن ەرەكشە جان: بويجەتكەن 3 جىل بويى جۇمىسقا ءبىر كيىممەن بارعان - فوتو

استانا. قازاقپارات - ادەتتە بويجەتكەندەر ءبىر كيىمدى ەكىنشى كۇنى قايتالاپ كيمەيدى. ءار كۇنى ءارتۇرلى وبرازدا كورىنۋگە تىرىساتىن ارۋلار ءۇشىن بىرنەشە كۇن بويى ءبىر كيىممەن ءجۇرۋ تىپتەن شوشىرلىق جاعداي.
None
None

الايدا جارنامالىق فيرمانىڭ ارت- ديرەكتورى ماتيلدا كال (Matilda Kahl) ءوزىنىڭ تالعامىنا ادالدىق تانىتتى. ول ءۇش جىل قاتارىنان كۇن سايىن جۇمىسقا اق جەيدە مەن قارا شالبار كيىپ بارعان. وسىلايشا ماتيلدا ءار تاڭ سايىن قىزدار باس قاتىراتىن «نە كيەمىن؟» دەگەن سۇراقتان ءبىرجولا ارىلماق بولعان.



بۇل تۋرالى شەتەلدىك LifeBuzz باسىلىمىنا سىلتەمە جاساپ Stan.kz حابارلايدى.

ءبىر كۇنى كيىم تاڭداۋدان جالىققان ماتيلدا بۇل ءىستىڭ كوپ ۋاقىت الاتىنىن ءارى قۋانىشتان قاراعاندا كۇيزەلىسكە كوبىرەك دۋشار ەتەتىنىن تۇسىنگەن. ىسكەرلىك كەزدەسۋ بارىسىندا ماتيلدا اينالاسىنداعى ەر ادامداردىڭ كيىمگە بولا باس قاتىرمايتىنىن اڭعارعان.



بۇدان كەيىن ماتيلدا كاسىبي ايەل ەكەنىن كورسەتەتىن، ءبىراق وتە قارايىم كيىم تاڭداپ، ونى ءوزىنىڭ جۇمىسقا كيەتىن كيىمىنە اينالدىرعان. بويجەتكەن جىبەك ماتادان تىگىلگەن 15 بىردەي جەيدە مەن 6 بىردەي قارا شالبار ساتىپ العان.

«جۇمىس كۇندەرى شىعارماشىلىق مىندەتتەر اتقارامىن، ال ول ءوز كەزەگىندە مەنىڭ ميىمدى جۇمىس ىستەتەدى. شىعارماشىلىق الەۋەتىمدى كيىم ارقىلى كورسەتۋدى قاجەتتىلىك سانامايمىن»، - دەپ ءتۇسىندىردى ەلدەن ەرەكشە ارۋ.



العاشقىدا ماتيلدانىڭ ارىپتەستەرى ءمان- جايدى تۇسىنبەگەن. ءتىپتى، جاڭا كيىم ساتىپ السىن دەگەن نيەتپەن باسشىلىق ونىڭ ايلىق جالاقىسىن كوتەرمەك بولىپتى.

ال ماتيلدا كيىمگە دەگەن كوزقاراسىن وزگەرتكەن سوڭ، ۋاقىتى مەن ەنەرگياسىن ۇنەمدەپ ۇيرەنگەنىن ايتادى. شىعارماشالىق سالادا جۇمىس ىستەيتىن ادامدار ءبىر كۇن ىشىندە كوپتەگەن مىندەتتەر اتقارادى. ال ءبىر كيىم كيە باستاعان سوڭ، ماتيلدانىڭ جۇمىسى بىرگە كەمىدى. ودان بولەك، ىسكەر قىز كيىم تاڭدامايتىندىقتان، جۇمىسقا كەشىكپەيتىنىن ايتتى (قىزداردىڭ ساعاتتاپ جينالىتىنىن بىلەسىز).



ماتيلدا ءوزىنىڭ كيىمگە دەگەن ەرەكشە كوزقاراسى تۋرالى ماقالا جازىپ، ونى Harper's Bazaar جۋرنالىندا جاريالادى. ونىڭ حيكاياسى بارشا جۇرتقا جاريا بولعان سوڭ، ارۋلاردىڭ باسىم بولىگى ماتيلدانى سىنعا العان.



ماتيلدانىڭ ايتۋىنشا، كۇندەلىكتى ءبىر كيىم كيۋ ارقىلى ول باسقا كيىمدەردىڭ ءقادىرىن تۇسىنگەن. ول دەمالىس كۇندەرى جارقىن ءتۇستى بەلدەمشەلەر مەن كەۋدەشەلەر، نازىكتىگىن كورسەتەتىن كويلەكتەر كيگەندى ۇناتاتىنىن ايتتى.



ارىپتەستەرى ماتيلدانىڭ ەرەكشە تاڭداۋىن قولدايدى. ولار، ءتىپتى ءبىر جولى «ماتيلدا سياقتى كيىنۋ» كۇنىن وتكىزىپ، كەڭسەگە بىردەي كيىممەن كەلگەن.

سوڭعى جاڭالىقتار