وقۋشى قىزدارىن ترامۆاي باسىپ كەتكەن وتباسىعا ەكىباستۇزدان 3 بولمەلى پاتەر بەرىلدى
بۇل تۋرالى پاۆلودار قالالىق ءبىلىم باسقارماسى ءبولىمىنىڭ مەڭگەرۋشىسى گۇلبارام بەليالەۆا ايتتى. «ەكىباستۇزداعى تۇرعىن ۇيدەن 8,5 ميلليون تەڭگەگە پاتەر الىپ بەردىك. ءۇش بولمەلى پاتەر، اناسىنىڭ ءوزى ەكىباستۇزعا كوشكىسى كەلگەن ەدى. سودان ءبىز، ءبىلىم بولىمىندەگىلەر، ەرىكتىلەرمەن بىرىگە وتىرىپ، اقشا جيناپ، پاتەر الىپ بەردىك. زاڭدى كەلىسىمدەر تولىقتاي اياقتالدى. وسى ايدىڭ سوڭىنا دەيىن وتباسى جاڭا پاتەرگە كوشەدى دەپ ويلايمىز»، - دەدى گۇلبارام بەليالەۆا.
ءبىلىم ءبولىمىنىڭ مالىمەتىنشە، پاتەر بالالارعا جولدان وتپەيتىندەي پاتەر تاڭدالعان. "پاتەر ماڭىندا مەكتەپ، بالاباقشا، ەمحانا ورنالاسقان ۇيدە ورنالاسقان. پاتەرگە اسەمدەۋ جوندەۋ جۇمىستارى قاجەت، ونى دا جاسايمىز. سونداي-اق، پاتەردى تولىقتاي جيھازبەن تولتىرۋ، تۇرمىستىق تەحنيكا قويۋ ۇيعارىلدى. قازىرگى ۋاقىتتا قىزدى ۇيىندە وقىتىپ جاتىرمىز، سەبەبى ءبىر اي بويىندا ول رەابيليتاتسيادان وتەدى. سونىمەن قاتار، وبلىستىق ءبىلىم باسقارماسى باسشىسىنان بالالاردىڭ اناسىن جۇمىسپەن قامتۋ، سونداي-اق كەنجە ۇلىن بالاباقشاعا ورنالاستىرۋ تاپسىرماسى ءتۇستى. بارىنشا كومەك كورسەتىپ جاتىرمىز. ارمەن قاراي بۇل وتباسىعا كومەكتەسەمىز»، - دەدى بەليالەۆا.
ەسكە سالايىق، جانتۇرشىگەرلىك وقيعا 7 -قىركۇيەكتە لوموۆ پەن قاتايەۆ كوشەلەرىنىڭ قيىلىسىندا ساعات 7:43 تە بولعان. 2007 جانە 2009 -جىلعى قىزداردى ترامۆاي باسىپ كەتكەن. امال نە، ءبىرى قازا تاپتى، ەكىنشىسى جانساقتاۋ بولىمىنە تۇسكەن. پاۆلودارلىق ترامۆاي باسقارماسىنىڭ باسپا ءسوز قىزمەتىندەگىلەر كولىكتىڭ وقيعا كەزىندە ءبىرىنشى مارشرۋت بويىنشا اليۋمينيي زاۋىتىنا بارا جاتقانىن ايتتى. تىزگىندە بەس جىلدىق تاجىريبەسى بار 1987 -جىلعى قىز بولعان. بالالار پاۆلودارداعى №4 -ورتا مەكتەپتە وقىعان. وقۋ مەكەمەسىندەگىلەر قىزداردىڭ اپەكەلى-ءسىڭلىلى ەكەنىن ايتادى. «بۇل وقيعا ەندى عانا بولدى. اپەكەلى- سىڭلىلەر، ەكىنشى جانە ءتورتىنشى سىنىپتا وقيدى»، - دەپ حابارلادى مەكتەپتەگىلەر.
