قازاقستاندا 3 مىڭعا جۋىق كينوتۋىندى سيفرلىق قالىپقا كەلتىرىلەدى
دوڭگەلەك ۇستەلگە ق ر ۇلتتىق اكادەميالىق كىتاپحانانىڭ ديرەكتورى ءۇمىتقان مۇڭالبايەۆا، ق ر مادەنيەت جانە سپورت مينيسترلىگىنىڭ، قازاق عىلىمي- زەرتتەۋ ينستيتۋتىنىڭ وكىلدەرى، بەلگىلى كينورەجيسسەرلەر، قازاقسانداعى فرانسيا ەلشىلىگىنىڭ وكىلى قاتىستى.
ۇلتتىق سيفرلىق كينوكوللەكتسيانى قالىپتاستىرۋ پرەزيدەنت نۇرسۇلتان نازاربايەۆتىڭ «بولاشاققا باعدار: رۋحاني جاڭعىرۋ» باعدارلامالىق ماقالاسىنىڭ مادەني مۇرانى ساقتاۋ بولىمىندەگى مادەنيەت سالاسىنا قويىلعان مىندەتتەردى ىسكە اسىرۋ كەزەڭدەرىنىڭ ءبىرى بولىپ تابىلادى. قازىرگى تسيفرلىق تەحنولوگيالار الەمىندە اقپاراتتاندىرۋدىڭ ءرولى كۇننەن كۇنگە ارتىپ كەلە جاتىر. ءتىپتى بۇگىنگى تاڭدا جەر شارىنداعى حالىقتىڭ 70 پايىزى ينتەرنەتكە كىرە الادى. وسىلايشا، حالىق پەن بيزنەستىڭ مەملەكەتتىك قىزمەتتەرگە قول جەتىمدىلىگى، اقپارات الماسۋ پروتسەسى جەڭىلدەگەن. وسى تۇرعىدا العاندا قر كيونەماتوگراتسياسىنىڭ سوڭعى ون جىلدا جەدەل دامىپ كەلە جاتقانىن اتاپ ءوتۋ كەرەك. وسى ءۇردىس ارقىلى قازاقستاندىق تولىقمەتراجدى فيلمدەردىڭ سانى كوبەيدى.
رەسمي ستاتيستيكاعا سۇيەنسەك، قازاقستاندا جىل سايىن 10-15 ويىن فيلمى شىعارىلادى. شىعارىلىپ جاتقان دەرەكتى فيلمدەر سانى دا ارتىپ كەلەدى. ق ر مادەنيەت جانە سپورت مينيسترلىگىنىڭ قازاق عىلىمي- زەرتتەۋ ينستيتۋتىنىڭ باس ديرەكتورى اندرەي حازبۋلاتوۆتىڭ ايتۋىنشا، كينو سالاسىنىڭ دامۋىنىڭ كەلەسى كەزەڭى كينو ءونىمدى ساقتاۋ، دامىتۋ جانە وسى تۋىندىلارعا قول جەتىمدىلىك ءۇشىن جاعداي جاساۋ بولىپ تابىلادى. سەبەبى، بۇگىنگى تاڭدا قازاقستاندا مەملەكەتتىك قورداعى فيلمدەردىڭ 90 پروتسەنتى سيفرلانباعان. بۇل مىندەتتەردى ق ر ۇلتتىق سيفرلىق كينوكوللەكتسياسىن قالىپتاستىرۋ جوباسى شەشەدى. جوبا اياسىندا ۇلتتىق كينوكوللەكسيالارعا جول اشاتىن پلاتفورمانى جاساۋ جوسپارلانىپ وتىر. ال پايدالانۋشىنىڭ جانر، تاقىرىپ پەن تيپ سىندى ولشەمدەر بويىنشا فيلمى تاڭداۋ مۇمكىندىگى بولادى. وسىلايشا، كينوءوندىرىس ءۇشىن بۇل ونلاين مۇراعات بولسا، پايدالانۋشى ءۇشىن ونلاين كينوتەاتر رەتىندە قىزمەت اتقارادى.
«جوبا بيىل عانا باستالدى. ءبىزدىڭ ينستيتۋت فيلمدەردىڭ ءتىزىمىن جاساۋ ءۇشىن عىلىمي- زەرتتەۋ جۇمىستارىن جۇرگىزدى. بۇگىنگى كۇنى قازاقفيلمدە 1500-گە جۋىق كوركەم، دەرەكتى جانە عىلىمي تۇرعىدا تانىمال فيلمدەر بار. ولاردىڭ بارلىعى دا 13 مىڭ بىرلىكپەن سيفرلانباعان كۇيى ساقتالۋدا. سونىمەن قاتار، رەسەيدىڭ مەملەكەتتىك كينوقورىندا تاعى 1,5 مىڭ تۋىندى بارىن انىقتاپ وتىرمىز. بۇنىڭ ءبارى ءبىزدىڭ حالىقتىڭ مۇراسى. تۋىندىلاردى سيفرلاۋ جوباسى 3 جىلعا ارنالعان. وسىلايشا، ءبىز ول تۋىندىلاردىڭ ەلەكتروندىق بازاسىن ازىرلەيمىز. ول بازادان كەز كەلگەن پايدالانۋشى ءوزىن قىزىقتىرعان كينولارعا قول جەتكىزە الادى»، - دەيدى اندرەي حازبۋلاتوۆ.
اۆتور: ايان بەكەن ۇلى
